Búgin QR Aýyl sharýashylyǵy mınıstrliginiń baspasóz ortalyǵynda 2017 jylǵy kóktemgi egis jumystarynyń júrgizilý barysy týraly mınıstrlik ókilderiniń qatysýymen brıfıń ótti dep habarlaıdy "Qamshy" aqparattyq agenttigi QR ASHM Baspasóz qyzmetine silteme jasap.
Aǵymdaǵy jyly AÓK sýbektilerimen kóktemgi egis jáne egin jınaý jumystaryn júrgizýge bólingen búdjettik nesıe kólemi 60 mlrd. teńge. Osy qarajattardyń sheńberinde jalpy 3 mln. ga egistik alqapty qamtı otyryp, 1500 AÓK sýbektilerin qarjylandyrý kózdelip otyr.
Bıylǵy jyly kóktemgi egis jumystaryna beriletin paıyzdyq mólsherleme aıtarlyqtaı tómendetildi.Qazirgi tańda sharýalar tikeleı «Agrarlyq nesıe korporasıasynan» burynǵy 5% kredıttiń ornyna 2% zaemdy ala alady. Al eger nesıe ekinshi deńgeıli bank arqyly beriletin bolsa, sońǵy qaryz alýshy úshin kredıtteý mólsherlemesi 6%-dan aspaıdy. Óıtkeni bankke qoıylǵan mólsherleme 3,7%-dan 2%-ǵa deıin qysqartyldy. Eger qarjylandyrý kredıttik seriktestik nemese mıkroqarjy uıymy arqyly júzege asyrylatyn bolsa, sońǵy qaryz alýshy úshin mólsherleme 6%-dan aspaıtyn bolady. Bul jaǵdaıda da kredıttik seriktestik pen mıkroqarjy uıymdary úshin kredıtteý mólsherlemesi 5%-dan 3 % - ǵa deıin tómendetildi.
Korporasıadan nesıe alý úshin sharýalar turǵylyqty turyp nemese jumys istep júrgen jerlerdegi 13 aımaqtyq fılıaldyń birine, sondaı-aq Astana qalasynda ornalasqan ortalyq keńsege kelip qujattaryn usynýy tıis.
Osy rette, memlekettik qarajattardy paıdalanýdyń tıimdiligin jáne qaıta óńdeýmen aınalysatyn kásiporyndardyń júktemeligin arttyrý maqsatynda qarjylandyrý tetikteri basyńqy baǵyttar boıynsha júzege asyrylady. Atap aıtqanda, birinshi kezekte maıly daqyldar men mal azyǵy daqyldary qarjylandyrylady.
Eske sala keteıik, Qazaqstannyń astyq óndirýshileri de búdjettik kredıtti ala alady. Joǵaryda aıtylǵandaı, memlekettik búdjetten bólingen 60 mlrd teńgeniń 22 mıllıardy 1 sáýirge deıin basymdyqqa ıe daqyldar úshin saqtalady. Qalǵan 38 mıllıard teńge ózge daqyldarǵa, sonyń ishinde bıdaı daqyldaryna da úlestiriledi. 1 sáýirden soń 22 mlrd teńge rezervten alynyp, ıgerilmegen qarjy bolsa ereksheligi men basymdyqtarǵa qaramaı barlyq daqyldarǵa berile bastaıdy.
Osy jyly tuqymnyń sapasyna erekshe kóńil bólinedi. Jańa Memlekettik baǵdarlamanyń aıasynda aýyl sharýashylyǵy taýar óndirýshilerin joǵarǵy sapaly tuqymmen qamtamasyz etý maqsatynda tuqym sharýashylyǵyn qoldaý mehanızmi jetildirildi. Mysaly, aǵymdaǵy jyldan bastap biregeı jáne elıtalyq tuqymdardy sýbsıdıalaý qaıtadan bastalatyn bolady, al birinshi reprodýksıaly tuqymdar tek basymdy daqyldar boıynsha jáne eń tómengi normasyz sýbsıdıalanatyn bolady. Budan basqa jemis-jıdek daqyldary men júzimniń elıtalyq kóshetteri jáne birinshi urpaqty býdandaryn sýbsıdıalaý jalǵastyrylatyn bolady.
Úkimette QR Aýyl sharýashylyǵy mınıstrligi usynysymen kóktemgi egistik jumystary bastalǵan kezden bastap, dızel otynyna beriletin aksız mólsherin a.j. sáýir aıynan bastap mamyr aıyna deıin tonnasyna 9300 teńgeden 540 teńgege deıin arzandatý týraly sheshim qabyldandy
Qabyldanǵan sheshim aýyl turǵyndarynyń 2 mlrd. teńge kóleminde qarjysyn únemdeýge múmkindik beredi.
2017 jylǵy kóktemgi dala jumystaryn ýaqytyly júrgizýdi qamtamasyz etý maqsatynda 375 myń tonna mólsherinde qajetti dızel otynynyń kólemi aıqyndaldy, onyń ishinde 254 myń tonna naýryz-sáýir aıyna bekitildi. Naýryz-sáýir aıyna bekitilgen baǵa lıtrine 105 teńge. Naryqtyq baǵa lıtrine 131 teńge bolǵanda, operatorlardyń shyǵynyn eskere otyryp, aýyl sharýashylyǵy taýar óndirýshileri úshin lıtrine 121 teńgeni quraıdy
Aıta keteıik: 2017 jyly aýyl sharýashylyǵy daqyldaryn 22 mıllıon gektar alqapta ornalastyrý josparlanýda, bul 2016 jylmen salystyrǵanda 311 myń gektarǵa artyq. Onyń ishinde kóktemgi egis kólemi 18,5 mln. ga quraıdy.
