QR UQK tóraǵasy Kárim Másimov Qytaı Halyq Respýblıkasynyń delegasıasy men qoǵamdyq qaýipsizdik mınıstri Go Shenkýnmen Astanada kezdesti, - dep habarlady kaz.tengrinews.kz

Aıta keteıik, Qytaı Halyq Respýblıkasy Astanaǵa Shanhaı yntymaqtastyǵy uıymy hatshylarynyń 12-kezdesýine kelgen bolatyn. Taraptar terorızmmen kúresý máseleleri, transulttyq qylmystyq toptarmen jáne esirtki saýdasymen kúresý joldaryn, sondaı-aq, kıberqaýipsizdikpen qamtamasyz etý máselesin talqylaǵan.

Sonymen qatar, Kárim Másimov pen Go Shenkýn Shanhaı yntymaqtastyq uıymyna múshe elderdegi arnaıy qyzmettiń arasyndaǵy yntymaqtastyqty kúsheıtý múmkindigin qarastyrdy.  Kezdesý barysynda Shanhaı yntymaqtastyq uıymy keńistiginde terorızm, ekstremızm men separatızm salasyndaǵy ózekti problemalardy sheshý maqsatynda ýaǵdalastyqqa qol jetkizildi.

Aıta ketetin bolsaq, Kárim Másimov 1988 jyly Pekındegi Til bilimi ınstıtýtynda oqyǵan. 1991 jyly Qytaıdaǵy Ýhan zań ýnıversıtetin bitirgen.