Astanada Mańǵystaý oblysyndaǵy Oil Construction Company kásiporny jumysshylary kásipodaǵynyń eńbek qaýipsizdigi ınspektory Nurbek Qushaqbaevqa sot úkimi shyqty. Bul týraly Azattyq habarlady.
Astananyń Almaty aýdanynyń №2 sotyna Oil Construction Company (OCC) kásiporny jumysshylary kásipodaǵynyń eńbek qaýipsizdigi ınspektory Nurbek Qushaqbaevqa qatysty sot úkimin tyńdaýǵa ondaǵan belsendiler - sottalýshynyń jaqtastary keldi.
"Qazaqstan Respbýlıkasy atynan" dep bastalatyn úkimdi oqyǵan sýdıa Mańǵystaý oblysyndaǵy Oil Construction Company (OCC) kásiporny jumysshylary kásipodaǵynyń eńbek qaýipsizdigi boıynsha ınspektory, 1982 jyly týǵan Nurbek Qushaqbaevtyń qylmystyq kodekstiń 402-baptyń 2-bóligi ("zańsyz ereýilge qatysýdy jalǵastyrýǵa arandatý") boıynsha "qylmys jasady" dep tanylǵanyn, eki jarym jylǵa bas bostandyǵynan aıyrylatynyn málimdedi. Sýdıa úkiminde Qushaqbaevtyń buryn sottalmaǵany, úılengeni, kámelet jasqa tolmaǵan bir balasynyń bar ekeni aıtyldy. Sot sheshiminde Qushaqbaevtyń jazasyn jalpy rejımdegi kolonıada óteıtini, jaza merzimi onyń qamaýǵa alynǵan (2017 jylǵy qańtardyń 20-sy - red.) kúninen bastap esepteletini jazylǵan.
Eki jarym jyl bas bostandyǵynan aıyrýdan bólek, sot úkimi boıynsha Qushaqbaevqa eki jyl merzimge qoǵamdyq qyzmet atqarýǵa tyıym salyndy. Sýdıa úkimniń "jábirlenýshi tarap Techno Trading kompanıasy talap etken 25 mıllıon 199 myń 717 teńge "materıaldyq shyǵyndy" Nurbek Qushaqbaevtan óndirý" týraly bóligin oqyp jatqanda sotqa kelgen azamattar bul somanyń tym qomaqty ekenine narazylyq bildirgen.
Nurbek Qushaqbaev 2017 jyly qańtar aıynda - munaıshylardyń ashtyq aksıasy ótip jatqan kezde ustalǵan. Ol kezde Aqtaýda Mańǵystaý oblysyndaǵy Qalamqas jáne Jetibaı munaı kenishterinde isteıtin Oil Construction Company (OSS) mekemesiniń birneshe júz jumysshysy Táýelsiz kásipodaqtar konfederasıasynyń ádilet mınıstrligi aryzymen jabylýyna qarsy ashtyq jarıalap jatqan.
Qushaqbaevpen birge OSS kásipodaǵy tóraǵasy Ámın Eleýsinov te ustalǵan. Ámın Eleýsinovke qylmystyq kodekstiń 189-babynyń 4-bóligi boıynsha («senip tapsyrylǵan bóten múlikti ıemdený nemese talan-tarajǵa salý») aıyptar taǵylǵan. Eleýsinovtiń soty áli bastalǵan joq.
OSS kompanıasynda eki kásipodaq uıymy bar. 2011 jyly kompanıa jumysshylary kásiporyndaǵy kásipodaq uıymy quqyqtarymyzdy qorǵamaıdy degen ýájben táýelsiz kásipodaq uıymyn quryp, oǵan jetekshilikke Ámın Eleýsinovti saılaǵan.
Keıin ashtyq aksıasyna qatysqan 63 munaıshyǵa azamattyq jáne ákimshilik sot arqyly 20-dan 50-ge deıingi aılyq eseptik kórsetkishke teń (1 AEK – 2269 teńge) aıyppul salynyp, sot jalpy somasy 3 mıllıon 854 myń 870 teńge shyǵyndy óteýdi mindettegen.
Halyqaralyq kásipodaqtar konfederasıasy Qazaqstan bıliginen OSS kompanıasy kásipodaǵy lıderleri Ámın Eleýsinov men Nurbek Qushaqbaevty qýdalaýdy doǵaryp, ekeýine bostandyq berýdi talap etken.
Human Rights Watch halyqaralyq quqyq qorǵaý uıymy Qazaqstannyń seriktesterin, onyń ishinde Eýropa Odaǵy men AQSH-ty Eleýsinov pen Qushaqbaevty bosatý úshin Astanaǵa yqpal etýge shaqyrǵan.
