Án álemine taǵy bir sazdy áýen qosyldy. Qazaqtyń búkil mýzykasy - saǵynyshtyń sazy. Altaı men Atyraýdyń arasyndaǵy ulanǵaıyr dalany mekendegen Alash jurty kóp dúnıeni án arqyly jetkizgen. Sondaı bir júrek terbeter, muńy men syryn áýenge jasyrǵan "Táńirtaý" áni jaryqqa shyqty. Án avtory - Qazaq elinde azamattyq belsendiligimen, eldik, ulttyq máselelerge beıjaı qaramaıtyn memleketshil ustanymymen tanylǵan Erlan Tóleýbaı. Bul kúnde jýrnalısıka salasynda esimi elge tanys Erlan myrza sońǵy kezderi qazaq án áleminiń de esigin eppen ashyp,  halyqtyń dástúrli dalalyq sarynyn jańasha jetkizip júr. "Táńirtaý" áni Erlan myrzanyń týǵan jeri Boǵdaǵa arnaǵan kezekti sálemi! 

Erlan Tóleýbaıdyń "Aýylǵa saǵynysh", "Saǵan keldim atajurt" syndy jan qalaýymen jaryq kórgen áýenderi Bıbigúl Qılymhan syndy bulbul kómeı ánshilerdiń oryndaýymen jurt júreginen oryn tapty. Al qazir tusaýy kesilip jatqan "Táńirtaý" áni de arǵy-bergi qazaqqa jat emes, jaqyn ataý. Án sóziniń avtory - Qytaıdaǵy belgili aqyn Yqylas Orazbaı. Aıta keterligi "Táńirtaýdy" buǵan deıin Erekeńniń "Aýylǵa saǵynyshyn" Tatarstannyń Qazan qalasynda oryndap, tyńdarmandardyń qulaq quryshyn qandyrǵan Bazarbaı Muratuly oryndady. Ol azamat ta Boǵdanyń kúngeıinde Sanjy oblysy, Shonjy aýdany, Qarasaı qystaǵynyń týmasy. Qazir Reseı federasıasy, Qazan qalasy Konservatorıasynyń vokal án bóliminde sońǵy kýrs stýdenti. Bir qansha retki respýblıkalyq,  halyqaralyq konkýrstardyń jeńimpazy. Avstralıa,  Túrkıa,  Reseıdiń túrli qalalarynda kóptegen konkýrstar men festıvaldarge qatysqan. "Kezinde áıgili ǵulama,  Aqyt qajy Úlimjiulynyń kitaby alǵash basylǵan kóne Qazan qalasynda meniń ánim shyrqalǵanyna óte qýanyshtymyn" deıdi Erlan Tóleýbaı myrza. 

Án - halyq qazynasy. Onyń ómirsheńdigi jurt júreginen oryn taba bilýinde. "Qamshyger" Erlan Tóleýbaı myrzanyń "Táńirtaý" ánin sol bıikten kórý bárimizge násip bolsyn!