Baıqońyr aılaǵynda negizgi ǵarysh kemesine aınalýy tıis Qazaqstan men Reseıdiń birlesken «Suńqar» zymyrany 2024 jyly qurastyrylyp bitedi.
Bul týraly inform.kz «Izvestıa» basylymyna silteme jasap habarlaıdy.
«Roskosmos» memlekettik korporasıasy usynǵan joba sıpattamasynda atap kórsetilgenindeı, ǵarysh kemesin synaý 2024 jyly bastalmaq. Al 2025 jyly «Suńqar» komersıalyq paıdalanýǵa beriledi. Osydan soń, «Roskomos» geptılmen ushyrylatyn Proton-M raketalaryn qoldanýdy doǵarady. Qazaqstandyq seriktester korporasıanyń usynysyna kelisimin berip otyr, dep habarlady basylymǵa «Qazǵarysh» agenttigine jaqyn derekkózderdiń biri.
Degenmen jańa raketanyń ushyrylýyna qajetti jańa ınfraqurylymnyń qurylysyna qatysty saýaldar áli de ózekti.
«Qarajat jaǵy negizinen Qazaqstan tarapynan bolǵandyqtan, bul máseleniń qarjylyq jaǵy talqylanýda. Esepteý jumystary júrgizilýde. Biraq ıdeıa deńgeıinde bul bizge unaıdy», - dep keltiredi derekkózdiń sózin basylym.
Qazaqstan men Reseı ekologıalyq taza «Báıterek» zymyran-tasyǵyshyn ushyrý boıynsha jumystardy atqaryp keledi. Buryn habarlanǵanyndaı, «Roskosmos» «Báıterek» kesheniniń jańa formattaǵy áriptestigin damytýdy usyndy. Reseı tarapy Qazaqstan úshin «Zenıt» zymyranynyń barlyq jaqsy qyrlaryn alatyn jańa ekologıalyq taza zymyran qurastyryp beredi. Al Qazaqstan jaǵy zymyran ushyrylatyn ınfraqurylymyn daıyndaýy tıis. Basylym málimetteri boıynsha, raketanyń qurylysyna qajetti qarjy 2016-2025 jyldarǵa arnalǵan Federaldyq ǵarysh baǵdarlamasy aıasynda bólinedi. Raketanyń qurylysyn Samaralyq «Progres» ǵarysh ortalyǵy júrgizedi. Oǵan Hrýnıchev ortalyǵy men Makeev atyndaǵy zymyran ortalyǵy qoldaý kórsetpek.
