20 ǵasyrdyń basynda arheologtar Pompeıdegi výlkannyń qaldyqtarynyń astynan bir-biriniń qushaǵynda jatqan eki deneni taýyp alǵan. Biraz jyldar boıy bulardy áıel adamdar dep tanyp kelgen, alaıda ǵalymdar birneshe ýaqyt buryn tabylǵan denelerdiń jynysyn anyqtaý maqsatynda súıekteri men tisterine keńnen zertteý jumystaryn júrgize bastady, dep habarlaıdy "Qamshy" aqparattyq agenttigi sheteldik BAQ-qa silteme jasap.

Stefano Vanakora esimdi ǵalym bastaǵan bir top zertteýshilerdiń ashqan jańalyqtary buǵan deıin aıtylǵan pikirlerdiń bárin joqqa shyǵardy, «eki áıel» eki er adam bolyp shyqty.

«Pompeılikter tań qaldyrýdan jalyqpaıdy. Osy ýaqytqa deıin bulardy eki áıel adam dep oılap kelgenbiz. Alaıda, kompúterlik tomografıa men DNQ saraptamasy bul ekeýiniń er adam ekendigin dáleldedi. Málimetterge sáıkes, eki er adamnyń jas mólsheri 18-20 shamasynda. Bulardyń denesi biri ekinshisiniń keýde tusyna basyn qoıyp jatqan kúıinde tabyldy», - dep habarlady arheologıalyq zertteýlerdiń jetekshisi Massımo Osanna.

Sonymen qatar, ǵalymdardyń oıynsha, eki er adam bir-biriniń súıgen adamdary bolýy ábden múmkin. Degenmen, muny 100 paıyz quptaı almaıdy. Tek, bir ǵana naqty dálel – ekeýi bir-birimen týystas bolmaǵan, baýyrlar da emes, áke men bala da emes.

Vezývıı výlkanynyń atqylaýy bizdiń zamanymyzdyń 79 jylynda tamyz aıynda bolǵan. Sonyń saldarynan Pompeı, Gerkýlaným, Stabıı atty úsh qala men birneshe kishigirim aýyl turǵyndary qaza tapqan. Pompeı qalasyndaǵy 20 myń turǵynnyń eki myńǵa jýyǵy kóz jumǵan bolatyn.  Kóptegen basqa turǵyndar bul apatqa deıin qalany tastap ketken, al qaza tapqandardyń denesi qala syrtynda kómilip qalyp qoıǵan. Sol sebepti de, kóz jumǵan adamdardyń naqty sanyn shyǵarý múmkin emes.

Aýdarǵan: Nazerke Labıhan