Birde Feısbýktegi paraqshamdy aqtaryp otyryp, jasy 25-30-dar shamasyndaǵy qyzdyń sýretin kózim shaldy. Esimi Aısha. Sýretiniń astynda «ómirden ózin izdegen áıel» degen jazba boldy. Ózi aq jeıde kıgen, moınyna kúlgin tústi oramal baılaǵan. Betinde bir boıaý joq, sál bozaryp tursa da, tabıǵı sulýlyǵy basym. Bárinen buryn kóńilimdi aýdarǵan onyń kózderi boldy. Tuńǵıyq kózder... Tipti, sýrettiń ózinen bul kózderdiń ómirge degen qushtarlyǵy mol tereń oıly adamǵa tıesili ekenin ańǵarýǵa bolady. Sondaı-aq, qońyr kózderi shashynyń túsimen ádemi úılesken. Kórseńiz ǵoı, kózqarasynan ómirge degen jigerlik pen mahabbatty ańǵarar edińiz. Bul kózderdi kórgen jan umyta almas edi. 1 saǵat ótse de názik kúlkisimen baýraǵan tunyq kózdi qyzdyń beınesi kóz aldymda turdy. Paraqshasyna qaıta kirdim. Ózin jaqynyraq tanyǵym keldi. Kózbe-kóz kórispesem de...
Sýretterin aqtaryp otyryp taǵy bir kishigirim jazbasyn kózim shaldy. Ómir jaıly jazypty. Taǵdyrǵa baǵynýdy jón sanaıdy eken, ómirdi sol qalpynda qabyldaý kerek deıdi. «Taǵdyrdyń ár soqqysyna sabyrlyq tanytqan jón, ol sizge ne daıyndasa da, qabyl alyńyz» delingen jazbasynda.
Ári qaraı ómirdi súıetinin jáne moınyna artylǵan júkti sońyna deıin kóteretinin jazypty. Bul jazbalary men sýretten kórgen qyzǵa, men elestetken beınege múldem saı kelmeıdi. Nege osylaı jazǵanyn bilgim keldi, jaqynyraq aralasqym keldi, sózderiniń mánin túsingim keldi. Bir syrdyń baryn sezgem. Sóıtip, álgi qyz meniń dostyǵymdy qabyldady. Paraqshasyn ashyp, jańaǵy jazǵan jazbasyna kelispeıtinimdi jazyp jiberdim. «Adam óz bolashaǵyn ózi qalyptastyrýy kerek, taǵdyrǵa moıynusynýǵa bolmaıdy» dedim. Biraq jazǵanyma jaýap kelmedi. 2 kún kúttim. Paraqshasyna kirip, sýretterine súısine qaraıtynmyn. Júregimde bir ózgeristiń baryn baıqadym, bir jaǵynan álgi jazbany beker jazǵan ekenmin dep te ókindim. Tek úshinshi kúni Aıshaden jaýap keldi. Jazbasynda bári adamnyń qalaýyndaı bola bermeıdi delingen. Erteń túski ýaqytta meshittiń aldyna kelýimdi ótinipti. Odan soń lám-mım demedi. Men de mazalamadym.
Erteńgi kúni belgilengen ýaqytta qalalyq meshittiń aldyna bardym. Kóligimnen túspes buryn aınalaǵa bir kóz salyp shyqtym. Keıbiriniń namazǵa asyǵyp bara jatqandaryn baıqadym, keıbiri jol boıynda qaıyr tilep otyrdy. Bir ýaqytta azanshynyń daýsyn estidim, alaıda eshqandaı erekshelikti baıqamadym. Sóıtip, kóligimnen shyqtym da, meshittiń kire berisine qaraı adymdap kelemin. Qaıyr tilep otyrǵandar qoldaryn sozyp, aqsha berýimdi ótinip jatty. Aralarynda múgedekterge arnalǵan arbada oramal taǵyp, qara kúrteshe kıip otyrǵan áıeldi de baıqadym. Aldynda turǵan qorapshaǵa tıyn tastadym. «Siz maǵan jáne men sekildi birneshe adamǵa úmit syıladyńyz. Iaǵnı, Alla sizdi maǵan qutqarýshym retinde ádeıi jiberip otyr. Sizdiń bul tıynyńyz – Allanyń bergeni, sondyqtan qasaryspaı qabyldaımyn» dep álgi qyz oramalyn sheship, jymıa qarady.
Qudaıym-aı, ol Aıshanyń dál ózi ǵoı. Sol kózder, sol bozarǵan beıne, shashy dál sýrettegideı órilgen. Odan kózimdi almaı qarap qalyppyn, ne isterimdi bilmeı dalmyn. Keshe sulýlyǵyna tańyrqap qaraǵan qyz aldymda qaıyr tilep otyrady degen oı úsh uıyqtasam da túsime kirmegen. Abdyrap qalǵan júzimdi qyz da baıqady.
-Túrińizge qarasam kóńilińiz qalǵan sekildi. Meni túnngi klýbtardyń birinde kórem dep oılaǵan bolarsyz? - dedi.
Ne derimdi bilmegen men qaltamnan 5 myń teńge shyǵaryp, qolyna ustatyppyn. Biraq, ol almady.
-Endi bunyńyz aıaýshylyqqa jatady. Al maǵan eshkimniń de aıaǵany kerek emes. Qazir úıińizge baryp meni dostaryńyzdyń qatarynan óshirip tastarsyz. Biraq ol meniń ómirimdi ózgertpeıdi. Meniń myna arbaǵa tańylǵanyma on jyl boldy. Sol kúngi jol apatynan keıin úmitimniń bári sóndi. Qudaı meni ata-anammen qosa, eki aıaǵymnan da aıyrdy. Ananyń qurbysyna alǵysym sheksiz, sol kisiniń qamqoryndamyn. Ol da jalǵyz, men de jalǵyzbyn. Meniń ata-anam joq, onyń balasy joq. Ekeýmiz bir-birimizdi dál tapqandaımyz. Múgedektik boıynsha meniń alatyn zeınetaqym men onyń zeınetaqysy ekeýmizge jetpeıdi, sol úshin ár juma saıyn osynda kelip qaıyr tileımin. Osynda otyryp adamdardy baqylaımyn. Olardyń kózderinde aıaýshylyq joq, bizge tıyn tasatýdy qulshylyq aldyndaǵy rásim dep tanıdy, sol úshin bizdi kózderine ilmesten tıyndaryn tastap óz jónderimen kete beredi. Al, sizdiń aushańyzyd qabyldaı almaımyn. Eger, shyn kómekteskińiz kelse, meni úıime aparyńyz. Alys emes, osy mańaıda.
Men únsiz ǵana arbany súırep, ol kórsetken jolmen júrip kelemin. 10 mınýttan soń eski úıdiń aldyna kelip toqtadyq. Ol maǵan birdeńe aıtqysy kelgendeı tesile qarady. Sóıtip, alǵysyn aıtty da óz jónimen kete bardy. Eski úıdiń aldynda ony aq shaty áıel adam kútip turdy.
-Aısha, toqtańyz! Men birnárseni moıyndaýym kerek. Siz maǵan qatty unap qaldyńyz. Búgin kóp nársege kózim jetti, sizdiń ómirge degen qushtarlyǵyńyz meni tań qaldyrdy. Ótinemin, qındyqqa boı aldyrmańyz, qol ushyn sozǵan adamdardyń betin keri qaıtarmańyz, ol sizdiń ómirińizdi ózgertýi múmkin ǵoı.
-Joq, siz qudaı emessiz. Jáne óz aıaǵymmen júrip ketetin múmkindik jasaı almaısyz.
-Biraq, men sizge basqa jaǵynan kómektese alamyn. Myna arbada otyrsańyz da, boıyńyzdaǵy kemistikti baıqamasańyz eken deımin.
-Sonda qalaı? Maǵan úılenesiz be?
-Keshe sýretterińizdi qarap otyryp, sizdi qatty kórgim keldi. Aldymda dál men qalaǵandaı dana ári sulý áıel tur. Úmitim aqtaldy.
-Men sizge beker masyl bolamyn. Múgedek adammen turǵannyń qandaı qıyn ekenin sezip te turǵan joqsyz. Al, anaý turǵan áıel ony óte jaqsy biledi, - dep biz jaqqa qarap turǵan aq shashty áıeldi nusqady. Barǵan saıyn ol qyzǵa degen sezimim arta tústi, dál magnıt sekildi oǵan qaraı tartyla berdim. Tońyp qalǵan qoldaryn ustap, súıdim...
-Óz jolyńyzdy tabyńyz. Meni umytyńyz! – dedi de qyz burylyp ketip qaldy. Ony esik aldynda turǵan áıel kútip alyp, úı ishine kirgizdi. Kirip bara jatyp ekeýniń de kózderi mende boldy. Biri aıaýshylyqpen qarasa, biri qaıǵyra qarady. Men jaı ǵana qolymdy bulǵadym da, óz kóligime keldim.
Arada bir apta ótti. Aısha turatyn úıge keldim. Dýaly ózgergen, baqshasyndaǵy gúlderdi aramshópter basyp qalǵan. Esesine úıiniń ishi aǵaryp, qabyrǵalary boıalǵan. Aıshanyń bólmesinde jańa kompúter tur, eskisi durys istemeıtin. Aptasyna bir ýaqyt Aıshaǵa kosmetolog-stılshi kelip turady. Al tońazytqysh she? İshinde eń kerekti degen azyq-túlik qana. Tipti, bos tur dese de bolady.
Ekeýmizdiń alǵashqy kezedsýimizdiń erteńinde-aq Aısha meni umytqysy kelgen. Biraq men qaıta keldim... Onyń júzine qaradym da, jaı ǵana: «Men qudaı emespin! Alaıda saǵan kómektese alatyndaı qaýqarym jetedi», dedim.
Asyl Saǵymbekovtyń Feısbýk paraqshasynan alynǵan jazba
Aýdarǵan: Gúlim JAQAN
