Bir jigit úılendi. Ana baıǵus jalǵyz ulyn uıaǵa qondyrdy. Áttegen-aı deıtini osy bir qýanyshty bólisetin qasynda shaly joq. Tana kóz, keń mańdaıly súıkimdi bir qyzdy úıine kelin qylyp túsirdi. Ana da máz, bala da máz.
Qatty jaqsy kóretinin aıtyp, osy qyzdy kelin qylaıyq dep anasyn kóndirgen balasy bolatyn. Ańqyldaǵan anasynyń da alǵashynda kelin bala kóńilinen shyqty. Eki qoly bosap, beli jazylyp qalǵan ananyń kóńili shat edi. Biraq, bul qýanysh uzaqqa sozylmady. Balasy men kelininiń arasynda kıkiljińder paıda bola bastady. Keıinnen ol urysqa ulasty. «Ne boldy ekeýińe?» degen anaǵa jaýaptary mynaý boldy: «Siz aralaspańyz. Ózimiz sheshemiz». Sońynda belgili bolǵany, shúıkebas kelininiń qalaýy balasy ekeýi ǵana turǵysy keledi eken. «Anańdy qarttar úıine ótkizersiń, ne bolmasa bólek úı áperersiń. Áıteýir, ekeýmiz ońasha bolaıyq» degen kelinniń sózderi eken kúndelikti daýdy mazdatatyn.
Solq etkizip úı ápere salatyn balasynyń da qoly uzyn emes bolatyn. Oılaǵany qarttar úıi boldy. Anasyna osy bir máseleni jetkizýge oqtalǵan bala ashyp aıta almady. İshteı bárin sezgen ana ózi-aq ketýge oqtaldy. Osy ýaqytqa deıin alaqanda aıalap ósirgen urpaǵynan qorlyq kórem dep ana jany oılap pa edi?! Kóńilin muń basyp, júregin zil basyp, júgin jınady. Keterinde kelini shyǵaryp salýǵa daıyn tur. «Keregińizdi aparyp berip turamyz» dep qoıady arasynda. Al, balasy bolsa betine tike qaraı almaı, anadaı jerde jer súzip otyr. Sońǵy sheshimin taǵy da ózgertip qalar dep anasynyń úmit oty ósher emes. Biraz ýaqyt ótti. Ynjyq balasynda ún joq. Ananyń kózinen ystyq jas eriksiz arnasynan tasyǵandaı bolyp shyqty. Sóıtti de yzadan siresken qoldarymen esikti ashyp kete bardy.
Sodan beri birshama ýaqyt ótti. Balasy men kelininiń arasynda daýly másele bul ǵana emes eken. Kelini qaıdaǵy joq máselelerdi daý qylyp, ne kerek ekeýiniń arasy jaraspady. Sońynda jigit áıeline qarap: «Sen meniń baǵym ba desem, qaınaǵan sorym ekensiń. Anamnyń aldynda kináli qylǵanyń azdaı, endi meni qurtatyn túriń bar. Men qazir anamdy úıge ákelemin. Al, sen osy ýaqytta tabanyńdy jaltyrat», – dedi batyldanyp.
Anasynan qalaı keshirim suraıtynyn da bilmegen balasy, ne de bolsa anasy jatqan qarttar úıine tura umtyldy. Oıynda anasynyń balasyn qalaı qarsy alatyndyǵy. Keshirmeı qoısa qaıtem degen kúdik te joq emes. San túrli oı mazalap aqyry qaıyrymdylyq úıiniń esigin ashty. Bardy da dereý anasyn surady. Sol jerdegi qyzmetkerler jigitti mekeme basshysyna siltedi. Mekeme basshysyna baryp surasa, ol kisi jerge qaraı qaldy. Balasy bir nárseniń bolǵanyn sezip: «Ne boldy? Anam aýyryp qaldy ma?» – dedi oıyna bar kelgeni sol bolyp. Álgi basshy biraz únsiz turyp, anasynyń júrek talmasynan kóz jumǵanyn aıtty. Birneshe mınýt buryn shyǵaryp salǵanyn da jetkizdi. Sener-senbesin bilmegen balanyń kózi qaraýytyp, dúnıe astań-kesteń bolyp ketkendeı kórindi. Orny tolmas ókinishti jaǵdaıdy bastan keshirdi. Bar bolǵany sanaýly mınýttardyń buıyrmaǵanyn qarashy. Denesinde jan qalmaǵandaı qımylsyz qaldy. Aqyl-esinen aıyrylardaı jaǵdaıǵa tústi. Sorly bala ana sútin aqtaýdyń ornyna, qaıta aıaqqa taptady-aý. Anasy janynda bolsa tóbesine kóterip, bar jaqsylyǵyn úıip-tógip jasar ma edi. Biraq, tym kesh…
Pikir qaldyrý