Sáýirdiń 10-y kúni Almatydaǵy Stýdentter saraıynda Qajymurat Sheshenqululynyń «Týǵan el» atty shyǵarmashylyq kesh ótti dep habarlaıdy Qamshy.kz.
Keshti Qajymurat Sheshenqululy ansambldiń súıemeldeýinde ánderimen bastady. Keshtiń ózgesheligi sol ár nómir bir-birimen baılanysyp, sahnalyq qoıylymdarmen árlendi. Altaıdyń, Tarbaǵataıdyń, İleniń áýenderi Almaty aspanynda shyrqap, ónerge shólirkep qalǵan tyńdarman qaýymnyń saǵynyshyn basty.
Qajymurat keshine Qazaqstannyń kóptegen óner juldyzdary arnaıy qonaq bolyp, ánshini óner keshimen quttyqtady. Atap aıtqanda Roza Álqoja, Maqsat Bazarbaı, Aıqyn Tólepbergen sıaqty ánshiler Sheshenqululymen dýet quryp án shyrqasa, Aqjol Meıirbekov, Ushqyn Jamalbek sıaqty óner juldyzdary ánnen shashý shashty.
Keshti belgili telejýrnalıster Aman Tasyǵan men Erqanat Kópjasar júrgizdi. Keshtiń senarıyn Qaırat Qulmuhamed jazǵan. Batys pen Shyǵyspen eseńgirep ketkendeı bolǵan estradaǵa jańa lep ákelgen Qajymurat Sheshenqululy Qytaı qazaqtary arasynda halyqqa tanylǵan. Ol 7 jyl buryn Atajurtqa qonys aýdarǵan. Sondaı-aq jurt Qajymuratty «Qara jorǵany» tiriltip, qazaq sahnasyna ákelgen azamat retinde de tanıdy. «Týǵan el» konsertinde de «Qara jorǵa» bıiniń tarıhy aıtylyp, ózgeshe sahnalyq qoıylymmen jurt nazaryna usynyldy.
Keshte jurtqa keńinen tanylǵan «Qara jorǵa» ǵana emes, Qajymurattyń «Maqpaljan», «Búldirgen qyz», «Seni ǵana» sıaqty jastar jatqa aıtyp ánderi de oryndaldy. Qajymurat Sheshenqululy ánshi ǵana emes júzden astam ánniń mýzykasyn jazǵan. Kesh barysynda ózi jazǵan birneshe án de oryndaldy. Qajymqurattyń Roza Álqojamen dýetinde Erjanat Baıqabaıdyń sózine jazylǵan «Máńgilik saǵynysh» atty áni, Maqsat Bazarbaevpen oryndaǵan aıtysker aqyn, telejúrgizýshi Qalıhan Qabdyrasolulynyń áni "Áppaǵym" kórermenniń aıryqsha alqaýyna bólendi.
Kesh sońynda arnaıy jaıylǵan dastarhanda Talǵar aýdanynyń depýtaty Ábdiǵanı Bázilhan kesh ıesine Almaty oblysy Kásipodaqtarynyń arnaıy alǵys hatyn tapsyrdy. Sondaı-aq, «Elbasy kýrstastary» qorynyń keńesshisi, óner janashyry Muhambetkárim(Torǵaı) Eleýbaı ánshige mingizgen atyn Erlan Tóleýbaı tabys etti.
Aıta ketsek, bul kesh Ánshi óziniń sahnada júrgen 15 jylynda alǵash ret kólemdi konserti. Atajurtqa oralǵannan keıin ol erkin shyǵarmashylyq jumyspen aınalysyp keledi. Byltyr Monǵolıada Baıan-Ólgeıde 1500 adamdyq zalda eki ret konsert qoıǵan. Qobda aımaǵynda, Bulǵynda, eń sońynda Ulanbatyrda 2500 adamdyq zalda konsert berdi. Sondaı-aq ótken jyly Eýropada gastroldik saparda, Germanıada, Keln qalasynda bolyp, «Qara jorǵa» ánin shyrqap keldi. Oǵan qosa birneshe fılmde ishinara rólder alyp, akterlik jaǵynan da óz qyryn kórsetti. Atap aıtqanda "Habar" arnasyndaǵy "Taǵdyr tartysy" telehıkaıasyna tústi.
Erlan TÓLEÝBAI
