OQO ákimi: Elbasy qazaqstandyqtardy eski ádetter men erejelerden bas tartýǵa shaqyrdy. Bul týraly Ońtústik Qazaqstan oblysynyń ákimi J.Túımebaev ardagerler qozǵalysynyń 30 jyldyǵyna oraı uıymdastyrylǵan merekelik sharada aıtty, dep habarlaıdy «Qamshy» aqparattyq agenttigi OQO ákiminiń baspasóz qyzmetine silteme jasaı otyryp.

Shara barysynda aımaq basshysy QR Prezıdenti Nursultan Ábishuly Nazarbaevtyń «Bolashaqqa baǵyt: Rýhanı jańǵyrý» maqalasy týraly sóz qozǵap, ondaǵy ıdeıalardyń máńgilik el muratyna jetýdegi naqty, aıqyn qadamdary ekenin aıshyqtady.

«Prezıdent maqalanyń kirispe bóliminde qazaqstandyqtarǵa osy jyldyń basynda memlekettiń úshinshi jańǵyrýynyń bastalǵanyn eske saldy. Jańǵyrýdyń maqsaty - Qazaqstannyń alǵashqy 30 damyǵan memleketterdiń qataryna kirýi. Elbasynyń aıtýynsha, atalǵan maqsatqa qol jetkizý úshin jeke adamdardyń ǵana emes, búkil eldiń básekelestikke qabilettiligin arttyrý qajet. Ol qazaqstandyqtardy eski ádetter men erejelerden bas tartyp, pragmatık bolýǵa shaqyrady. Sebebi, bul ózgeris memlekettiń modernızasıasyna úlken úles qosady»,-dedi ákim.

Ardagerler keńesiniń qurylǵanyna 30 jyl tolý merekesine oraı uıymdastyrylǵan sharanyń alǵashqy bastamasy ekenin aıtqan oblys ákimi basqosýǵa óńirimizge eńbegi sińgen, respýblıkaǵa belgili, ár salada uzaq jyldar boıy qyzmet etken ardagerler kelip otyrǵanyn atap ótti. Sonymen birge, búgingi Elbasynyń oı tolǵanysyn abyz aqsaqaldardyń arasynda talqylap, ony keleshek urpaqqa uǵyndyrýda qazynaly qarıalarǵa artylar júktiń basym ekenin jetkizdi.

«Halyqty tolǵandyryp júrgen máseleleriniń barlyǵy osy kólemdi maqalada oryn tapqan. Sizderdiń ómirden alǵan úlken tájirıbelerińizdi eskere otyryp, Memleket basshysynyń osynaý rýhanı jańǵyrý týraly maqalasyn basshylyqqa alý arqyly qoǵamǵa jetýin qolǵa alsańyzdar degen tilegim bar. Oblysymyzdyń ekonomıkasyn, mádenıeti men bilimin ármen qaraı damytýda osy maqala qajetti baǵyt-baǵdar beretin bolady»,-dedi J.Túımebaev.