Kúni keshe Elbasymyz Nursultan Ábishulynyń «Bolashaqqa baǵdar: rýhanı jańǵyrý» maqalasy jarıalanǵan bolatyn. Soǵan baılanysty «Qamshynyń» hat qorjynyna ÁESI sarapshysy Serik Beısembaevtyń saraptamasy kelip tústi. Oqyrman nazaryna usynamyz.

 «Prezıdenttiń «Bolashaqqa baǵdar: rýhanı jańǵyrý» maqalasy bıliktiń jańa ıdeologıalyq platforma qalyptastyrýǵa bet alýynyń nyshany. Bul platformanyń negizinde jańa zaman aǵymyna sáıkes ózgerýge daıyn bolý ıdeıasynyń jatýy óte quptarlyq nárse. Bizde kóp ýaqyt boıy damyǵan elderdiń qataryna kirý tek ekonomıkalyq damý men jańa tehnologıalar arqyly júzege asady degen sholaq túsinik boldy. Iaǵnı, biz baı bolsaq jáne smartfondy paıdalansaq aldyńǵy qatarly elge aınalamyz degen sıaqty. Alaıda, damýdyń eń birinshi alǵysharty – bul mádenıet pen qundylyqtardyń ózgerýi. Jańasha oılaý bolmasa, damý da bolmaıtyndyǵy bizdiń jáne aınalamyzdaǵy kórshilerimizdiń tájirıbesi kórsetip otyr.

Qazaq qoǵamynda sońǵy 10-15 jyldar ishinde kúrdeli ózgerister oryn aldy. Ál-aýqattyń artýy jáne qala halqynyń kóbeıýi jańasha oılaıtyn áleýmettik toptyń paıda bolýyna alyp keldi. Dál osy top úshin prezıdenttiń maqalasynda aıtylǵan pragmatızm, básekege qabilet, ashyqtyq sekildi qundylyqtar mańyzdy bolyp tabylady. Bular kóbinese jaqsy bilim alǵan, birneshe til biletin, óz dástúri men qatar zamanaýı ómir saltyn ustanatyn jańa qazaqtar býyny. Jáne bir erekshelik – bular eldegi qoǵamdyq-saıası ómirge yqpal etýge múddeli belsendi top. Bıliktiń jańa ıdeologıany damytýy arqyly dál osy topqa súıenýine múmkindigi bar.

Qazirgi jahandyq ózgerister kezeńinde ár memleket ózindik ustanymyn qalyptastyrý ústinde. Bul ózgeristerge úrke qarap, ızolásıa arqyly ózimizdiń biregeıligimizdi saqtap qalamyz degen sekildi ıdeıalar – bul búkil eldi artqa súıreıtin óte qaýipti mıf. Qazaqstandaǵy joǵarǵy bılik, maqalaǵa súıensek, progres pen ashyqtyq jolyn tańdap otyr. Biraq, endigi másele - maqalada aıtylqan ıdeıalardyń saıası shynaıylyqqa aınalýy»

Serik Beısembaev, ÁESI sarapshysy