Londonda 12 sáýirde júzdegen adam Reseı elshiligi aldyna jınalyp, Sheshenstanda "geılerdi azaptap, óltirý" oqıǵalaryna qarsylyq tanytty, dep jazady Azattyq.

 Buǵan deıin reseılik BAQ pen quqyq qorǵaý uıymdary Sheshenstanda gomoseksýalısterge qarsy naýqan bastalǵanyn jáne geılerdi "konsentrasıalyq lagerlerge" qamap jatqanyn habarlaǵan. Keıbir aqparattarǵa qaraǵanda, bul lagerlerde júz shaqty adam ustalyp otyr, kem degende úsh adam qaza tapqan.

Londonda LGBT (lesbı, geı, bıseksýal, transgender) qaýymdastyǵyn beıneleıtin tý ustaǵan demonstranttar "Lagerlerdi jabyńdar" dep urandatyp, aksıa ótkizgen orynǵa qyzǵylt gúlder qoıdy. Aksıa janynan ótip bara jatqan kólikter olardy qoldaıtynyn bildirip, sıgnal berdi. "Bizben birdeı quqyqtary joq adamdardy qorǵaǵanymyz jón" dedi narazylyqty uıymdastyrýshy Stıv Teflor Reuters agenttigine. Sheshenstanda jynystyq azshylyq ókilderine qarsy qýǵyn-súrgindi tekserýdi suraǵan onlaın-petısıaǵa 70 myńǵa tarta adam qol qoıǵan.

Sheshenstandaǵy jynystyq azshylyq ókilderi men oǵan kúdiktilerdi jappaı qýǵyndaý kampanıasynyń bastalǵany jaıly 1 sáýirde reseılik "Novaıa gazeta" habarlaǵan. Basylymnyń aqparatyna qaraǵanda, Sheshenstan bıligi gomoseksýalısterdi "tazalap" jatyr. Sheshenstan ishki ister mınıstrligi bul aqparatty "birinshi sáýir kúngi ázil" dep atady. Al Sheshenstannyń Kreml qoldaıtyn basshysy Ramzan Qadyrov ózi basqaratyn respýblıkada "gomoseksýalıster joǵyn" málimdegen.