Májilis depýtaty Azat Perýashev «Nurly jer» memlekettik baǵdarlamasy boıynsha jataqhana salýǵa usynys tastaǵan bolatyn. Soǵan baılanysty, qoǵam qaıratkeri Muhtar Taıjan óz pikirin bildirdi dep habarlaıdy «Qamshy» aqparattyq agenttigi.

Muhtar Taıjan óz sózinde: "Bul "sheshimdi" usynǵan adam aldymen ózi úlgi kórsetsin. As úıi men jýynatyn bólmesi joq jataqhanaǵa ózi birinshi kóship barsyn. Osy usynystyń shynaıylyǵyna sol kezde kózimiz jetedi", - dedi.

Depýtattyń atalǵan usynysyna eks-áriptesi Muhtar Tinikeev te óziniń feısbýk paraqshasynda pikir bildirdi: «Qaraǵandy qalasynda áli kúnge deıin Stalın-Hrýshev ýaqytynan qalǵan ýaqytsha turǵyn úılerde halyq kúneltip júr. Ýaqytshadan asqan turaqtylyq joq! Eshqandaı jaǵdaıda bulaı jasaýǵa bolmaıdy!»

Eks-depýtat qazaqstandyqtarǵa turǵyn úı boıynsha kómektesýdiń tıimdi jolyn usyndy:
«Eger halyqqa turǵyn úı máselesi boıynsha kómekteskimiz kelse, olarǵa baılanys júıeleri qosylǵan 10 sottyq jerden bólip bereıik. Bir komersıalyq úıge eki-úsh áleýmettik úıler salynbaıynsha ákimshilikke elıtalyq turǵyn úı keshenderin salýǵa jer berýge tyıym salýymyz kerek».

 Esterińizge sala keteıik, "Jýyný bólmesi men as úısiz salynǵan turǵyn úı 40 paıyzǵa arzanǵa túsedi. Osylaısha, 2021 jylǵa deıin «Nurly jer» baǵdarlamasy boıynsha jalǵa beriletin 35 myń páter emes, 49 myń páter salýǵa bolady. Bul páterlerge halyqtyń muqtaj bóligin, onyń ishinde, aýyl jastaryn qonystandyrýǵa bolady", -  degen bolatyn A.Perýashev.