Májilistiń Agrarlyq máseleler komıtetiniń uıymdastyrýymen «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» Zańy jobasynyń tusaýkeseri boldy. Bul týraly Qamhsy.kz Májilis úıine silteme jasap habarlaıdy. Onyń jumysyna Palata Tóraǵasynyń orynbasary Vladımır Bojko men atalǵan komıtet tóraǵasy Saparhan Omarov sondaı-aq parlamentshiler, memlekettik organdar men azamattyq qoǵam ókilderi men aýyl sharýashylyq ónimin óndirýshiler, sarapshylar qatysty.

Aýyl sharýashylyǵy vıse-mınıstri Erlan Nysanbaev depýtattyq korpýsty Zań jobasynyń negizgi erejelerimen tanystyrdy.

Mınıstrdiń orynbasary «jer salasynda týyndaǵan suraqtar boıynsha arnaıy komısıa jumys jasady. Qoǵamdyq pikir týǵyzǵan máseleler jóninen moratorıı merzimi 5 jylǵa uzartylyp Jer kodeksiniń 24, 37, 97 jáne 101- baptaryna aýyl sharýashylyǵy jerlerin qazaqstandyqtarǵa jeke menshikke, sheteldikterge jalǵa berýdi toqtata turatyn ózgerister engizildi.

Komısıa múshelerimen halyqtyń pikiri eskerile otyryp jerdi qazaqstandyqtarǵa jalǵa berý ınstıtýtyn odan ári jetildirý qajettiligi týraly sheshim qabyldanǵan bolatyn»,- dep Májiliske usynylyp otyrǵan Zań jobasy osy máselelerdi qamtıtynyn málimdedi.

«Sonymen Komısıa kelesi sheshimderdi qabyldady:

1. Aýyl sharýashylyǵy jerlerin qazaqstandyqtarǵa jalǵa berý ınstıtýtyn saqtaý jáne ony jetildirý;

2. Jalǵa beriletin aýyl sharýashylyǵy jerleriniń shekti mólsherin belgileý;

3. Shekara mańynan aýyl sharýashylyǵy jerlerin berýde qoıylatyn talaptardy kúsheıtý;

4. Halyqqa qajetti jaıylym jerlerdi anyqtaý.

Jer reformasy jónindegi Komısıanyń usynysy negizinde Aýyl sharýashylyǵy mınıstrligimen onyń janynan qurylǵan jumys tobynyń usynystary men eskertýleri eskerile otyryp «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» Zańynyń tujyrymdamasy men jobasy ázirlendi.

Zań jobasymen aýyl sharýashylyǵy jerlerin qazaqstandyqtarǵa jalǵa berý ınstıtýtyn saqtaı otyryp, olardy konkýrstyq negizde berýdiń jeke tártibin belgileý kózdelgen.

Konkýrstyń aıqyndylyǵy úshin konkýrstyq komısıanyń quramyna komısıa músheleriniń keminde 50%-yn qoǵamdyq keńester men uıymdardyń ókilderin qosý kózdelgen.

Konkýrstyń jarıalylyǵy men oǵan barlyq qatysýshylarynyń qoljetimdiligin qamtamasyz etý maqsatynda jańa tártip konkýrs ótkiziletindigi týraly habarlandyrý BAQ men ASHM, ákimdikterdiń resmı ınternet-resýrstarynda ornalastyrýdy, sonymen qatar, bir ýaqytta barlyq aýdan ákimdikterine resmı saıttary men aqparattyq qabyrǵalarynda ornalastyrýdy kózdeıtin bolady. Atalǵan normaǵa sáıkes, aýyl sharýashylyǵy jerleri konkýrstyq komısıamen, arnaıy tizilimge sáıkes júrgiziledi.

Atalǵan tizilim aýdannyń jer qatynastary bólimderimen qurylyp, mindetti túrde qoǵamdyq keńester, Ulttyq kásipkerler palatasy jáne qoǵamdyq uıymdarmen kelisilip, aýdan ákimdigimen bekitiledi.

Konkýrstyń ótkizilýiniń ashyqtyǵyn qamtamasyz maqsatynda konkýrstyq qoǵamdyq keńes pen uıymdardyń ókilderinen qurý qarastyrylǵan.

Bul rette, konkýrstyq komısıanyń quramy jergilikti ókildi organdarmen bekitiletin bolady»,- dep naqtylap túsindirip ótti.

Memlekettik shekaranyń shekara beldeýi sheginde ornalasqan aýyl sharýashylyǵy jerleri jeke menshikke de, jer paıdalanýǵa da berilmeıdi.

Atalǵan aýmaqtarda aýyl sharýashylyǵy jer ýchaskelerin jergilikti halyqtyń qajettiligi úshin paıdalanýǵa ǵana (jaıylym, shabyndyq retinde jáne t.b.) ruqsat beriledi.

Jeke aýla malyn jaıý úshin qajetti jaıylym jerlerdiń jetispeýshilik máselesin sheshý úshin Zań jobasymen eldi mekender aınalasynda jeke aýla malyn ustaý boıynsha halyqtyń muqtajyna qajetti jaıylymdar aýdandaryn anyqtaý boıynsha norma qarastyrylǵan.

Atalǵan aýmaqtarda Qazaqstan Respýblıkasynyń jeke jáne zańdy tulǵalaryna jer paıdalanýǵa berýge tyıym salynatyn bolady.

Budan basqa, qazirgi ýaqytta jaıylymdardyń kóp bóligi jeke menshikte jáne jer paıdalanýda ekenin eskere otyryp, ákimderge olardy halyqtyń jaıylym jerlerge degen qajettiligin memleket muqtajyna engizý jolymen alyp qoıý múmkindigi beriletin bolady»,- dedi vıse-mınıstr.

Usynylyp otyrǵan Zań jobasy:

- aýyl sharýashylyǵy jerlerin jalǵa berý ınstıtýtyn jetildirý;

- jerlerdi paıdalaný men qorǵaýdy memlekettik baqylaýdy kúsheıtý;

- memleket muqtajy úshin jer ýchaskelerin májbúrlep alyp qoıý máselelerin retteıdi.

Óz kezeginde, depýtattar men shaqyrylǵandar jer zańnamasyn qoldaný praktıkasyndaǵy, sondaı-aq Úkimet usynǵan zań jobasyna qatysty negizgi ózekti máselelerdi kóterdi.

Nátıjesinde, zań jobasymen odan ári jumys barysynda qosymsha qaraýǵa jáne zertteýge tusaýkeserdi ótkizý barysynda jumys tobynyń músheleri men otyrysqa qatysýshylar aıtqan kóptegen usynystar, eskertýler jáne tilekter jiberildi.

Endi tanystyrylǵan zań jobasy Májilis depýtaty Berik Ospanovtyń jetekshiligindegi jumys tobynda talqylanatyn bolady.