Prezıdent búgin tańerteń Bishkekke ushyp bardy dep habarlaıdy Qamshy.kz

Búgin Bishkek qalasynda eki birdeı saıası salmaǵy basym jıyn ótedi. Biri Joǵary Eýrazıalyq ekonomıkalyq keńestiń otyrysy, ekinshisi Ujymdyq qaýipsizdik týraly shart uıymy elderi basshylarynyń basqosýy. 

Bul eki kezdesýdiń jylda jaıdaq ótpeıtini ámbege aıan. Sol sebepti Qyrǵyz Respýblıkasynyń astanasynda órshil josparlar jarıalanatyny sózsiz. Kún tártibinde kóp másele kóteriledi.

Kesheli beri Qyrǵyz elinde qarbalas. «Manas» áýejaıynda qaýipsizdik sharalary kúsheıtilip, ortalyq kóshelerde kórikti kólikterdiń júrisi kóbeıdi. 

Almasbek Atambaev áriptesterine osylaı qurmet kórsetýge bel býypty. Qolda bar málimet boıynsha birinshi bolyp Bishkekke Moldova Prezıdenti jetken. İzin ala Armenıa, Belarýs, Reseı, Qazaqstan, Tájikstan elderiniń kóshbasshylary keldi. 

Búgin prezıdentter Joǵary Eýrazıalyq ekonomıkalyq keńestiń ótkenin ekshep, bolashaǵyna baǵdar jasaıdy. 

Sarapshylardyń aıtýynsha bul keńes, ádepki aqyldasýdan bólek bolady. Óıtkeni qazir naryqtyń synaǵy men terorızm – eldi bolmasyn alańdatyp otyr. Sol sebepti bul jolǵy aıtylar sóz ben bastamalar órshil bolatyny anyq. 

Máselen, odaqqa qyzyǵýshylyq tanytqan Moldovanyń usynysy jan-jaqty qaralyp, resmı Kıshınevti baıqaýshy retinde kiriktirý jaıy jospardan tabylýy múmkin. 

Onymen birge Eýrazıalyq ekonomıkalyq odaq elderi men Iran Islam Respýblıkasy arasyndaǵy erkin saýda aınalymyn jetildirý týraly da kelisim sóz bolmaq. 

Al Ujymdyq qaýipsizdik týraly shart uıymynyń otyrysynda taraptar jańa jahandyq syn qaterlerge synyp ketpeýdiń amaldaryn izdep, kún tártibinde turǵan qaýipsizdik qalqanyn kúsheıtý jaıyn da talqylap qalmaq.