Feısbýk qoldanýshysy Qajymuqan Ǵabdolla óz paraqshasynda laýazymdy tulǵalar nazaryna hat jazyp, jurtshylyqtan kómek surady, dep habarlaıdy Qamshy AA.
Men Qazaq Eliniń qatardaǵy bir qarapaıym azamatymyn. Kez kelgen pendeniń basyndaǵy jaǵdaılar meniń basymda da bar. Byltyr men ómirlik qosaǵym, úsh balamnyń anasy Qymbat Ótegenovadan kenetten aıyrylyp qaldym. Oılamaǵan jerden qasyret shegip, «DSP» dıagnozymen aýyratyn bir ul men bir qyzym jáne úlken ulym, qysqasy, úsh balammen qaldym. Qolymda jasy 80-ge jaqyndaǵan anam bar...
...Dúısenbi kúni, ıaǵnı, 17 sáýirde túski saǵat saǵat 12.30-da meniń Oral qalasyndaǵy (Muhıt kóshesi 64-úı) jeke úıimniń gazyn «QazTransGaz Aımaq» AQ Batys Qazaqstan óndiristik bólimshesiniń Eskendırov degen bir jumysshysy anam balalarǵa tamaq pisirip jatyrǵan kezde (aldyn ala esh eskertýsiz) aıyryp ketipti. Qarıa anamnyń «Men qazir aqshańdy qolma-qol tóleıiń» degenine de kónbeı, dóreki sóılep, tipti, aýyzyna kelgen boqtyq sózder aıtypty. Eskendırov zeınetaqysy shaılyǵyna ázer jetip otyrǵan qart anamnyń jylaǵanyna qaramaǵanymen, sóz arasynda: «Qasymda bastyqtarym bar» dep, para suraǵandaı ısharat jasapty. Qorlanǵan anam, sharasyz kúıde qala bergen...
Men dereý «QazTransGaz Aımaq» AQ Batys Qazaqtan óndiristik bólimshesiniń Oral qalasyndaǵy keńsesine bardym. «QazTransGaz Aımaq» AQ Batys Qazaqtan óndiristik bólimshesiniń dırektory Azımbek Azımbaevıch Asarov eńbek demalysynda (Ótirik-shynyn bir qudaı biledi?!. Q.Ǵ.) eken, men «QazTransGaz Aımaq» AQ Batys Qazaqstan óndiristik bólimshesi dırektorynyń birinshi orynbasary Asylbek Temırxanovıch Kaıbalıevke arnaıy kirip, bar shyndyqty: ózimniń gaz qyzmetine qaryzymdy bilmeı qalǵanymdy, eshqandaı eskertýdiń bolmaǵanyn, óz qaryzymdy tóleýden bas tartpaıtynymdy, tek, anaý orynsyz ústemelengen qomaqty qarjyny quraıtyn «gazdy qaıta qosý» úshin 10 000 teńge tóleý kerek degendi alyp tastaýyn surap, otbasylyq jaǵdaıymdy da ashyq aıttym. Asylbek Kaıbalıev: «Jaraıdy, birinshi qabatta kútińiz, kómektesemiz» – dep ýádesin berdi. Men de rıza kóńilmen alǵysymdy aıttym...
Biraz ýaqyttan keıin Renata degen qyzmetker kelip: «17 880 teńge naqty qaryzyńyzdy tóleńiz, gazyńyzdy búgin qosady» – dedi. Men dereý suraǵan aqshasyn tólep, úıge qaıttym. Sóıtsem mennen Asylbek Temırhanovıch aldap qutylǵan eken. Arada kóp ótpeı álgi Renata degen qyzmetker maǵan qaıtara habarlasyp: «Sizdiń gazyńyzdy qospaıtyn boldyq, «gazdy qaıta qosý»-ǵa (za podklúchenıe) qosymsha 10 myń teńge tólemeseńiz, «gazdy qospaımyz» dep jatyr bastyq. Múmkin Ahmetov Erlan degen taǵy bir bastyq bar soǵan bararsyz, ol kisi kómekteser» – deıdi...
Olardyń ózderi bir mınóttiń ishinde jaý qýǵandaı ajyratyp ketken gaz qubyryn qaıta qosý úshin men qosymsha 10 myń teńge aqsha tóleýim kerek eken. Bul qandaı zań? Nendeı tártip? Kimdi basynǵandyq?
Biz zańdy, quqyqtylyqty, kez kelgen qoǵamnyń eń qymbat baılyǵy sanalatyn adamdardyń quqyqtaryn saqtaýǵa umtylǵan memlekette turyp jatyrmyz ba, álde, árkim, ár mekeme oıyna kelgendi isteıtin, adamnyń quqyqtaryn tabanǵa taptaıtyn berekesiz keńistikte turyp jatyrmyz ba?
Jaraıdy, gaz qyzmetine qaryz bolyp qalyppyz, onyń tólemderin aı saıyn qadaǵalaıtyn adamdar qaıda júr? Ár otbasynyń áleýmettik qaýqary da árqalaı, qazir ekiniń biri – jumyssyz, týram nanǵa tıyn tappaıtyndar da joq emes, endeshe, bizge aldyn-ala kelip, jáı sózben nege eskertpeıdi? Tipti, qaryz tólemdi jabýǵa ýaqyt pen mursat nege berilmeıdi?..
Adamshylyq janashyrlyq, meıirim men qaıyrym sezimderi qaıda ketti? «Naryq» eken dep, bir-birimizdi taptaýymyz kerek pe? «Aqsha tabamyz» degen maqsatpen aıýanǵa aınalýymyz kerek pe? Zańnyń ádiletti oryndalýyn qadaǵalaıtyn prokýrorlarymyz qaıda júr?
Kerek deseńiz, «Qaryzymdy qaıtarmaımyn» dep, qashyp júrgen eshkim joq. Azdaǵan ýaqyt pen bolmashy mursat suraıdy. Elbasymyz Nursultan Nazarbaevtyń ózi: «Otandyq kásiporyndardyń basshylaryn áleýmettik zańnamany oryndamaǵandary úshin jaýapqa tartýdy kúsheıtý kerek. Jekemenshik bolǵanymen, óz zańdaryn bekitip, ýshyqtyrýǵa eshkimniń quqy joq» – degen demep pe edi?!.
Elimizdiń Prezıdenti tórt jyl buryn óziniń Jarlyǵymen Tutynýshylar quqyqtaryn qorǵaý agenttigin quryp, úsh jyl buryn bul organ Ulttyq ekonomıka mınıstrliginiń Tabıǵı monopolıalardy retteý, básekelestikti jáne tutynýshylardyń quqyqtaryn qorǵaý komıteti bolyp, qaıta quryldy. Memleket basshysynyń sondaǵy basty maqsaty – adamdardyń quqyqtaryn qorǵaý edi ǵoı!
Elimizdiń búgingi Bas prokýrory J.Q.Asanovtyń tyń bastamalary kóp azamat sekildi, máseleni – adamdardyń beıbit ómir súrýin naqty qamtamasyz etýden nege bastamasqa?!.
Álde, «QazTransGaz Aımaq» AQ Batys Qazaqtan óndiristik bólimshesi (bálkim, basqa da tolyp jatqan mekemeler) ózderi ajyratqan gaz qubyryn qaıta qosýǵa ár tutynýshydan qosymsha 10 myń teńge alyp, baıyp otyra bere me?..
Mysaly, bizdiń oblysymyzda 160 myńǵa tarta tutynýshy-núkteleri bar eken, sonyń árbirine ótirik syltaý taýyp, jylyna, kem degende, bir ret sóndirip, 10 myń teńge aıyppul salyp óndirip alsa, bul mekeme 1 mlrd 600 mln teńge qosymsha taza tabys tabady eken! Mine, qanaýdyń – qyzyl qany men qasap maıdany! Minekı, jemqorlyqtyń jaıyndaı jemsaýy!
Qysqasy, men búginde múgedek balalarym men zeınetker anamdy emdete almaı otyrmyn, sondyqtan, artyq basty tıyn-tebenim joq!
Endi bir silkinip, prınsıpke baryp, qoldanystaǵy zańdar men quqyǵymnyń oryndalýyn talap etýge sheshim qabyldadym. Qatesin túsinip, jetim-jesirdi de aıamaı úıge basa kóktep kirip, eldi jylatyp, gazdy aıyryp ketken «QazTransGaz Aımaq» AQ Batys Qazaqtan óndiristik bólimshesiniń Eskendırov degen jumysshysy keshirim surap, ózi ajyratqan gaz qubyryn ózi kelip qosyp bermese, gazsyz otyra beremin!
MENİŃ TALABYM MYNADAI:
1. «QazTransGaz Aımaq» AQ «Batys Qazaqstan óndiristik bólimshesiniń Eskendırov degen jumysshysy meniń anam men bala-shaǵamnan keshirim surap, ózi ajyratqan gaz qubyryn (eshqandaı «gazdy qaıta qosý» degen qosymsha 10000 teńge tólemsiz) ózi kelip qosyp bersin!
2. «QazTransGaz Aımaq» AQ «Batys Qazaqstan óndiristik bólimshesiniń basshylyǵy jumysshy Eskendırovke tutynýshylarǵa dórekilik kórsetip, zańsyz áreketter jasaǵyny úshin jazba túrinde oǵan qatań eskertý jasasyn! (Eskertý jasalǵan buıryqtyń kóshirmesin jábirlenýshi – meniń anama arnaıy tapsyrsyn!).
MENİŃ JURTQA ÓTİNİSHİM:
1. El ishinde maǵan kómektese alatyn qorǵaýshylar bolsa, kómektesińizder!
2. El ishinde «QazTransGaz Aımaq» AQ Batys Qazaqstan óndiristik bólimshesi adamı hám tutynýshy quqyqtaryn buzǵan adamdar bolsa, shuǵyl xabarlasyńyzdar!
Biz birigip, belsene áreket jasasaq qana, óz arymyz ben quqymyzdy eshkimge taptatpaımyz! Tek sonda ǵana biz kóksegen bolashaqtyń baǵdary aıqyndalyp, naqty rýhanı jańǵyrý bastalady.
Qajymuqan Ǵabdollanyń feısbýk paraqshasynan alyndy
