Májilis depýtaty Bekbolat Tileýhan Bilim jáne ǵylym mınıstri Erlan Saǵadıevke depýtattyq saýal joldap, UBT suraqtaryna qatysty eldiń narazylyǵyn jetkizdi, dep habarlaıdy Qamshy AA Sputnik Qazaqstan tilshisine siltemeı jasaı otyryp.

"Jalpy, UBT formatynda oń ózgerister barshylyq. Biraq basty problema suraqtyń sapasynda bolyp otyr. Bilim salasynda árbir qadamnyń negizgi kózdegen maqsatynan tys ıdeologıalyq baǵytyn, rýhanı júgin eshqashan nazardan tys qaldyrýǵa bolmaıdy. Bul mańyzdy másele. Búginde bilim salasynyń eksperıment alańyna aınalyp ketýi óte alańdarlyq qubylys. Negizi bilim salasyna qatysty birde-bir maǵlumat jaýapsyz jazylýǵa tıis emes. Óıtkeni, onymen sýsyndaǵan balanyń erteń azamattyq pozısıasyna, memleketshildigine, eljandylyǵyna, tarıhı sanasynyń qalyptasýyna áser etetinin erekshe eskerý kerek", — deıdi depýtat.

Sonymen, depýtat UBT suraqtaryna qatysty halyqtyń pikirin bilip, eldiń kókeıindegi dúnıeni mınıstrge jetkizýdi jón kóripti.

"Gazette birinshi naýryzda jarıalanǵan UBT suraqtary qoǵamnyń aıyryqsha narazylyǵyna dýshar bolǵanyna bárimiz kýámiz. Test suraqtarynda Ermek Tursynov, Baıan Esentaeva, Nurtas Adambaı sıaqty shoý-bıznes, estrada ókilderi júr. Sportshylardan Golovkın bar. Eldiń pikirin áleýmettik jelilerde bilýge múmkindik bar. Sodan baıqaǵanymyz, eldiń narazylyǵy joıqyn. Mysaly, "ne úlgisi, ne ónegesi joq Esentaeva men Tursynovty urpaqqa úlgi qylýdan ne utamyz?" deıdi bireýi. Endi bireý "Freddı Roých ne qylyp júr?" dep tań qalady. Shynynda da, ol bizdiń rýhanı kodymyzǵa, bolashaqqa baǵdarymyzǵa, rýhanı jańǵyrýymyzǵa qatysy bar tulǵa ma?! "Golovkındi bárimiz jaqsy kóremiz, biraq ol Olımpıada chempıony emes" dep te jazypty. Shıshıgına men Sápıevti depýtat dep qospaı-aq qoısyn. Dıma Balandın men Danıar Eleýsinov Olımpıada chempıony ǵoı. Freddı Roých, Gonzales bul jerde ne istep júr? Klıchkonyń qajeti ne?", — deıdi Tileýhan.

"Jaqsy, Sháken Aımanov pen Sultan Hodjıkovty umytsyn, qaıtys boldy. Asanáli Áshimov pen Joljaqsynovtar qaıda? Olar, kári shyǵar, bálkı?! Eshki súıretip, eldi masqaralaǵan Ermek Tursynov "Jaýjúrek myń balany" túsirgen Aqan Sataev pen "Qazaq handyǵyn" túsirgen Rústem Ábdirashevtan nesimen ozdy?! Sartaı batyrdan eshki, Sábınka kelin Kereı men Jánibekten artyq boldy ma?! "Bul jerde ana tiline shorqaq adamdardy ádeıi tańdaı ma" deıdi halyq. Eldiń kózqarasy osyndaı", — dep keıidi depýtat.

Onyń aıtýynsha, klasıkalyq negiz, akademıalyq nusqa degen dúnıe qashanda ǵylymǵa irgetas bolǵan. Al osy kúni akademıalyq jazbalarǵa súıenbeı, ınternetten maǵlumat ala salatyn bolǵan. "Jalpy, buqaranyń sonshalyqty narazylyǵyna sebep bolǵan jaýapty tulǵalar jaýapkershilikke tartyla ma? UBT-daǵy osyndaı óreskel qatelikter jibergen testologtar shettetile me? Osyndaı keleńsizdikterge negizgi sebep júıeden dep oılaımyz. Sondyqtan, birinshi, oqý baǵdarlamasy, oqýlyqtar, UBT-nyń júıesindegi sabaqtastyqty qalyptastyrý qajet. Ekinshi, osyndaı asa jaýapty dúnıe qoǵamdyq talqydan ótýi kerek. Ulttyq kodymyzǵa, rýhanı jańǵyrýymyzǵa qatysty tulǵalar týra osy jerde órnek tabýǵa tıis", — dep túıindedi sózin Bekbolat Tileýhan.