Búgin Parlament Senatynyń jalpy otyrysynda  Úkimet basshysynyń atyna senator Murat Baqtıaruly: «Eńbek kóshi-qonyna talapty kúsheıtip, etnıkalyq kóshi-qondy jeńildetýge tıispiz», - dep saýal joldady.

Senat depýtaty óz sózinde sońǵy jyldary elge oralyp jatqan oralmandardyń azamattyq alýdaǵy jáne elimizde turaqty turýdaǵy quqyqtyq, ákimshilik kedergilerge tap bolyp jatqanyn aıtty. Atap aıtqanda,  el Úkimetiniń 2012 jylǵy №362 qaýlysymen, 2014 jyldyń №111 qaýlysynyń negizinde júzege asatyn, qandastarymyzdyń atamekenine qonystanýyn qıyndatyp otyrǵan qujattyq qıyndyqtar sóz boldy.  Bul negizde qandastarymyzdan  onyń azamattyǵy, memlekettiń jazbasha kelisimi retinde bolýy múmkin ketý paraǵy, shetelge turaqty turý úshin ruqsatty rastaıtyn basqa qujattar men  kelgen elinde sottylyǵynyń bar, ne joqtyǵyn rastaıtyn qujattar talap etile bastaǵan.  Al kelgen elinen ákelingen qujattarǵa sol eldiń osyndaǵy dıplomatıalyq ókilderi mór basyp, maquldaıtyny tipti kúlkili jaǵdaı. Sebebi ár bir el kimge azamattyq berý máselesin basqa eldiń qandaı da bir ókilderiniń qatysýynsyz ózi sheshedi. Osy turǵydan Murat Baqtıaruly Úkimet basshysy atyna:  «Árıne, Úkimettiń atalǵan qaýlylary elimizge syrttan keletin kelimsekterdiń kóshi-qony aǵynynan týyndaıtyn qaýip-qaterdiń aldyn alý maqsatynda qabyldanǵanyn túsinýge bolatyndaı. Biraq, budan buryn mundaı talaptar etnıkalyq qazaqtarǵa qatysy joq edi, buǵan deıingi Úkimet qaýlylarynyń basym bóliginde másele sheteldegi qazaqtarǵa qatysty bolǵan jaǵdaıda «etnıkalyq qazaq ókilderinen ózge» degen tirkes arnaıy qosylatyn. Ókinishke qaraı, sońǵy birneshe jyldyń kóleminde sheteldegi qazaqtar múddesi kóbinese umyt qalyp, olardyń quqyqtyq dárejesi ózge sheteldikterdiń dárejesine deıin quldyrap ketti», - dep málimdeme jasady. Sondaı-aq, senator sheteldegi qandastarymyzdyń Qazaqstanǵa kelip turaqty turýyna kedergi bolmasy úshin, Úkimet qaýlysyna «etnıkalyq qazaqtardan ózge» degen bir aýyz sóz tirkesin qosýdy talap etedi ári etnıkalyq kóshi-qonǵa barynsha jeńildikter jasalýyn suraıdy.

Shetelden oralatyn qandastarymyzdyń aldynan shyǵatyn kóldeneń qıyndyqtar týraly qazaq tildi basylymdar úzdiksiz jazyp kelse de, oralmandardyń azamattyq alý tártibi 4 jyl bolyp bekitilgeli alǵash ret Parlament zalynda kóterilip otyr. Murat Baqtıaruly oralmandar máselesin úkimettiń esine jıi salyp turatyn depýtattardyń biri. Atap aıtsaq, osydan eki jyl ýaqyt buryn, 2012 jyly 18 qazanda  qandastarymyzdyń jaǵdaıyn jasaý týraly Úkimet basshysy atyna sal joldady.

Esterińizde bolsa mınıstr Tamara Dúısenova hanym jarym jyl buryn «elge oralatyn etnıkalyq qazaqtarǵa qysqa ýaqyt ishinde azamattyq berý tártibin qarastyratyn zań daıyndalady» dep málimdedi. Elbasy Nursultan Nazarbaev ta 6 tamyzda ótken Úkimettiń jalpy otyrysynda shetelden keletin qandastarymyzǵa bar jaǵdaıdy jasaý týraly tapsyrma berdi.

Taǵdyr taýqymetimen álemniń ár túkpirine tarydaı shashyraǵan qazaqtardyń «elge kelip ornalasýyna jaǵdaı jasaıtyn» zań jobasy aldyna kele qalsa, «EAEO shartyn ratıfıkasıalaý» sıaqty asa mańyzdy zańdardy bir oqylymda qabyldap jiberetin depýtattarymyz el úshin aıanbaıdy dep sanaımyz. Al, Úkimet basynda uzaq jyl otyrǵan, mol tájirıbeli Premer-mınıstr Kárim Másimov senator Murat Baqtıaruly kótergen máselege baılanysty zań jobasyn tezdetip daıyndaýǵa tıisti mınıstrlikterge tapsyrma beredi jáne qandastarymyzdyń  elge degen saǵynyshy men qujattyq qıyndyqtarǵa baılanysty ótinishin jete túsinedi dep úmit artamyz.

Nurǵalı Nurtaı