Asa qamqor, erekshe meıirimdi Allanyń atymen bastaımyn!

Qadirmendi aǵaıyn!

Musylman qaýymynyń ulyq merekesi – Qurban aıt qutty bolsyn! Aıtqa aman-esen jetkizgen Alla Taǵalaǵa sansyz shúkirler men maqtaýlar bolsyn!

Qurban aıt – birlik pen ıgilik, meıirim men keshirim merekesi. Bıyl musylman qaýymy bul merekeni 4 – 7 qazan aralyǵynda toılaıdy. Bul kúnderi musylmandar qaıyrly, izgi amaldar arqyly Jaratýshyǵa jaqyndaıdy. Qurban aıttyń birinshi kúni meshitte aıt namazy oqylǵannan keıin Allanyń razylyǵy úshin qurbandyq shalynady. Qarjylyq múmkindigi joq adamǵa qurban shalý mindet emes. Qurbandyq eti aǵaıyn-týys, kórshi-qolań, turmysy tómen otbasylaryna, jetim men jesirlerge, múgedekter men syrqat jandarǵa taratylady. Mundaı ıgi amaldar adamdar arasynda meıirim, qamqorlyq, keshirim, qaıyr-shapaǵat sekildi kórkem minez ben jaqsy qarym-qatynas qalyptastyrady. Allanyń razylyǵy úshin qurban shalý arqyly pendeniń ımany kúsheıip, taqýalyǵy artady. Qasıetti Quranda: «Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse – júrekterińizge uıalaǵan taqýalyq, Allaǵa degen qurmet» («Haj» súresi, 37-aıat), – dep baıandalǵan.

Qajylyqqa attanǵan musylman baýyrlarymyz, otandastarymyz júzderin qasıetti Qaǵbaǵa qaratyp, Arafat taýynda elimizdiń ıgiligi men halqymyzdyń birligin, eki dúnıeniń baqytyn tilep, Jaratqanǵa jalbaryna duǵa jasaýda.

Múbárak meıramnyń qurmetine oraı, barsha otandastarymdy, kásipker baýyrlarymdy, din janashyrlaryn Qurban aıtta múgedekter, jetimder men jesirler, ásirese qaraýsyz qalǵan ata-analar úshin arnaıy qaıyrymdylyq is-sharalar ótkizip, aıttyń qýanyshyn sezdirip, olarǵa múmkindiginshe kóńil bólýge shaqyramyn.

Alla Taǵala barshamyzdyń duǵa-tilekterimiz ben izgi amaldarymyzdy jáne shalǵan qurbandyqtarymyzdy qaıyrymen qabyl etkeı!

Ulttar men ulystardy meıirimdilikke, ıgilikke, birlikke úndeıtin ulyq mereke – Qurban aıt múbárak bolǵaı, aǵaıyn. Jaratýshy Iemizden otbasylaryńyzǵa amandyq, myqty densaýlyq, kásipterińizge adaldyq pen bereke tileımin.

Eńseli eldiń bolashaǵy baıandy, Táýelsizdigimiz máńgi bolǵaı! Áýmın!