Fransıanyń prezıdenttik saılaýynda jeńiske jetken 39 jastaǵy Emmanýel Makronnyń 64 jastaǵy áıeli Brıjıt Trone álem BAQ-tary eń kóp talqylaǵan taqyrypqa aınaldy.
Suhbattarynyń birinde Fransıanyń birinshi hanymy bıylǵy prezıdenttik saılaýda kúıeýi jeńiske jetkenin qatty qalaıtynyn, áıtpese kelesi prezıdenttik merzimge deıin óziniń 70-ke keletinin aıtyp, ázildegen edi.
Fransıa prezıdentiniń áıeli jaıly birqatar qyzyqty derekti Hellomagazine jýrnaly keltirip otyr, dep habarlaıdy Tengrinews.kz:
1. Brıjıt 1953 jyldyń 13 sáýirinde Fransıanyń soltústigindegi Amen qalashyǵynda belgili shokolate Jan Troneniń otbasynda dúnıege kelgen. 1872 jyly qurylǵan kondıterlik fabrıka pechenesimen tanymal - bıznes osy kúnge deıin jylyna 4 mıllıon eýro tabys ákeledi. Otbasy - kópbalaly, Brıjıt kenjesi bolǵan.
2. Brıjıt ákesiniń isin jalǵastyrǵysy kelmeı, fransýz jáne latyn tilderinen muǵalim bolǵan.
3. 21 jasynda Brıjıt bankır Andre Lýı Ozerge turmysqa shyǵyp, úsh bala taýyp bergen: balasy Sebastán jáne eki qyzy Lorens pen Tıffanı.
4. 1993 jyly 39 jastaǵy Brıjıt muǵalim bolyp jumys istep júrgen jáne týǵan qalasy Amendegi La providence jeke mektebinde teatr úıirmesin júrgizgen. Sol kezde ol 15 jastaǵy oqýshy Emmanýel Makronǵa ǵashyq bolǵan. Ol oqý jylynyń sońynda muǵalimine sóz salypty. Kóp jyl ótkennen keıin Brıjıt Emmanýeldiń sol kezde qatarlastaryna qaraǵanda úlken kórinetinin aıtqan: "Men ony eshqashan oqýshym dep eseptemegenmin, ol erekshe edi".
5. Fransýz jazýshysy Anna Feldtyń "Minsiz jas er adam" ("Un jeune homme si parfait") kitabyna súıensek, Emmanýeldiń ákesi Jan-Mıshel Makron Brıjıtke ulymen sóılesýge tyıym salypty. Emmanýel 17-ge tolǵanda, ata-anasy ony Parıjge IV Genrıh atyndaǵy gımnazıaǵa oqýǵa jibergen. Sodan beri Makron Brıjıtten eki saǵattyq qashyqtyqta bolǵan. Alaıda Emmanýel men Brıjıt hat almasyp otyrǵan. Kúnderdiń birinde ol úılenetinin málimdegen. 2007 jyly Brıjıt ajyrasyp, Makronǵa Parıjge kelip, ekeýi úılengen. Toıda Brıjıttiń eki qyzy bolǵan. Sóıtsek, qyzdarynyń biri Emmanýeldiń synyptasy bolǵan-mys.
6. Brıjıt - baqytty áje. Balalary oǵan jeti nemere syılaǵan. Emmanýel Makron olarǵa ákesindeı qaraıdy eken. Brıjıttiń 30 jastaǵy kenje qyzy Tıffanı Makronnyń shtabynda zańger bolyp qyzmet etedi. Birinshi hanymnyń tuńǵysh uly Sebasten Emmanýelden eki jas úlken. Al úlken qyzy Lorens Emmanýaelmen bir synypta oqyǵan.
7. Brıjıt bar ýaqytyn kúıeýiniń saıası qyzmetine arnaǵan, keıde tipti sóıleıtin sózin de jazyp beredi eken. Soǵan qaramastan, Brıjıt saıası qaıratker bolǵysy kelmeıtinin málimdegen. Aıtýynsha, tek "janynda bolǵysy keledi" eken.
Saılaýaldy kampanıa kezinde Emmanýel Makronnyń qarsylastary sheshesimen jasty áıelmen nekesi arqyly ol óziniń beıdástúrli orıentasıasyn jasyrady dep málimdegen. Alaıda buǵan jýrnalıser esh dálel taba almaǵan.
Emmanýel Makron Fransıa prezıdenti qyzmetine resmı túrde 14 mamyrdan bastap kirisedi. Sol kúni ulyqtaý rásimi ótedi.
Sholýshy: Gúlim JAQAN
