Eýroodaq shtab páteri sanalatyn Brússelde Qazaqstan Prezıdenti Nursultan Nazarbaev pen Eýrokomıssıa tóraǵasy Joze Manýel Barrozý kezdesý ótkizýde.
Kezdesý josparyna saı, áńgime barysynda taraptar Qazaqstan men Eýroodaq arasyndaǵy yntymaqtastyq pen keńeıtilgen áriptestik týraly jańa Kelisimge qol qoıý turǵysynda ekijaqty yntymaqtastyq máselelerin talqylaıdy. Sondaı-aq, halyqaralyq kún tártibindegi ózekti máseleler, sonyń ishinde Ýkraınadaǵy jaǵdaı boıynsha pikir almasady. Eýropalyq Odaq - Qazaqstannyń negizgi saıası, ekonomıkalyq, saýda jáne ınvestısıalyq seriktesteriniń biri. Bul kórsetkish boıynsha ol Reseı men Qytaıdan ozyq tur. Qazaqstannyń syrtqy saýda aınalymynyń jartysynan astamy jáne elimizdiń ekonomıkasyna tartylǵan sheteldik kapıtaldyń 49 paıyzy Eýroodaq úlesinde. OPEK-ke múshe emes elder arasynda Qazaqstan - Reseı men Norvegıadan keıingi Eýropaǵa energıa tasymaldaıtyn úshinshi iri memleket. Qazaqstannyń Eýroodaq elderimen qarym-qatynasy qaıshylyqsyz sıpatta jáne úzdiksiz nyǵaıyp keledi.
Sondaı-aq, búgin Parlament Senatynyń jalpy otyrysynda QR Ulttyq ekonomıka mınıstri Erbolat Dosaev Qazaqstannyń DSU-ǵa múshe bolýyna az ýaqyt qalǵanyn habarlady. Bıyl, 4 mamyrda Azıa damý banki Basqarýshylar keńesiniń 47-shi jyl saıynǵy otyrysynda Prezıdent Nursultan Nazarbaev: «biz Qazaqstannyń Dúnıejúzilik saýda uıymyna kirýine qatysty kelissózder úderisin aıaqtaýǵa jaqynbyz. Tolyq múshelik osy jyly oryn alady dep úmit artamyz», - degen bolatyn.
Sonymen qatar, búgin Parlament Senaty «EAEO kelisimi» týraly shartty ratıfıkasıalady. 1 qazandaǵy Májilistiń maquldaýynan soń Senat ta «EAEO kelisimi» kóp talqylap jatpady. Dál búgin, Qazaqstanmen qatar Belarýs Parlamenti de Eýrazıalyq odaqtyń kelisim-shartyn ratıfıkasıalady. Eýrazıalyq ekonomıkalyq odaq qurý týraly shart bıyl, 29 mamyrda Astanada qabyldanǵan bolatyn.
Álemdik ekonomıka turǵysynan DSU aýqymdy jáne aýdıtorıasy keń uıym. Eýroodaq bolsa Eýropalyq memleketter úshin ortaq damý strategıasy qalyptasqan qýatty ekonomıkalyq odaq. Al, jańa qurylyp jatqan EAEO - Eýroodaqpen básekelesýdi ózine mindetteıdi. Odaqqa múshe elder ortaq óndiristi damytý men Eýrazıalyq naryqty birge ıelenýge talpynyp jatyr. Atalǵan uıymǵa Qyrǵyzstan men Armenıanyń da múshe bolý ótinishi qaralýda.
Eýroodaqpen keńeıtilgen áriptestik nemese DSU músheligindegi Qazaqstan, sondaı-aq EAEO músheligindegi Qazaqstan. Bular Qazaqstannyń qaı uıymda bolmasyn óz upaıyn joǵaltpaýǵa jasalyp jatqan áreketteri me? Qazaqstan ázirge joǵarydaǵy ekonomıkalyq odaqtardyń bireýine de múshe emes. Desek te Qazaq eli osy baǵyttardyń eshqaısysynda qalys jumystar istep jatpaǵan syńaıly. Solaı bola tura, Reseımen Qazaqstan arasyndaǵy saýda áriptestigi anaǵurlym damyǵan. Al, búgin DSU týraly sóz qozǵaǵan Erbolat Dosev: «Qazaqstannyń DSU-ǵa kirýi máselelerinde DSU-ǵa qosylǵan Reseı tarapynan oryn alǵan kedergiler eńserildi» dedi. Ol qandaı kedergiler bolýy múmkin? Ýkraınada men Reseı arasyndaǵy jaǵdaıdan keıin álemdik saıasatkerlerdiń kóbi Pýtın bıligindegi Reseıge syn kózben qaraǵan edi. Olardyń ishinde Eýroparlament saıasatkerleri túgeldeı Pýtınge aýyr syndar aıtqan bolatyn. Quramyna Reseı qatysqan EAEO uıymyna múshe bolýǵa Qazaqstannyń jasaǵan áreketi qoǵamda túrli pikirler týǵyzyp, kóp talqylandy. Dál osy rette, Qazaqstan men Eýroodaq arasyndaǵy yntymaqtastyq pen keńeıtilgen áriptestik týraly jańa Kelisimge qol qoıylýy neni ańǵartady? Qazaqstannyń aldaǵy ekonomıkalyq qadamdary ózgerýi múmkin be? Bul suraqtarǵa oqyrmanmen birge jaýap izdemekpiz.
