«Nur Otan» partıasynyń «Qazaqstan. 2017 maqsattary. Ulttyq is-qımyl jospary» saılaýaldy tuǵyrnamasynyń «Halyq birligi» baǵyty boıynsha saraptama tobynyń kezekti otyrysynda QR Mádenıet jáne sport mınıstrligi Tilderdi damytý jáne qoǵamdyq-saıası jumys komıteti tóraǵasynyń orynbasary Serik Sálemov termınologıa salasyndaǵy problemalardyń birqataryn atady.

«Jyl saıyn memlekettiń qatysýynsyz ǵalymdar men basqa jeke tulǵalar túrli baspada shyǵaratyn ondaǵan sózdikter shyǵarýda. Olar tirkelmegendikten, tipti naqty sanyn aıtý da qıyn. Olardyń ishinde eki, úshtildik te, termınologıalyq ta sózdikter bar. Ártúrli kózqaraspen, eshbir maquldanbastan shyqqan sózdikterde birizdilik joq ekendigi túsinikti. Al bul sózdikterdi oqýshylardan bastap, ár býynnyń, ár mekemeniń qyzmetkerleri paıdalanady», - dedi ol.

«Búgingi tańda – qazaq termınologıasynyń qaıta qalyptasý kezeńinde búkil eldiń nazaryna usynylatyn sózdikterde birizdiliktiń bolmaýy salanyń damýyna kedergi keltirip, tıisinshe is júrgizýde keleńsizdikter týǵyzýda. Termınologıa salasy boıynsha elimizdiń aýmaǵynda shyǵarylatyn barlyq sózdikterge saraptama jasap, maquldaıtyn, termınderdi birizdendirip jáne retteıtin, jumysty júıeli túrde júrgizetin mekeme bolmaǵandyqtan, termınologıalyq leksıkany birizdendirý jáne rettelgen termınologıalyq qordy qalyptastyrý máselesi sheshilmeı otyr», - dep atap ótti S.Sálemov.

Aıta keteıik, otyrys qorytyndysy boıynsha arnaıy termınologıa ınstıtýtyn ashý, ony respýblıkalyq búdjetten qarjylandyrý, normatıvtik quqyqtyq qamtamasyz etý boıynsha pysyqtalǵan usynystar engizý, elimizdiń aýmaǵynda shyǵarylatyn barlyq sózdikterdiń arnaıy termınologıalyq ınstıtýtta saraptamadan ótýin mindetteýdi zańdastyrýdyń múmkindikterin qarastyrý, Memleketik til saıasatyn odan ári jetildirý jónindegi komısıa hatamasy tarmaqtarynyń tolyǵymen iske asyrý jáne basqa da naqty usynystar jasaldy.