Qytaı Halyq Respýblıkasynyń ınternet aqparat quraldarynyń ishindegi yqpaldy, taralymy keń elektrondy aqparat quraldarynyń biri bolyp sanalatyn «Shınlań» (sina.com.cn) saıtynda Qazaq halqynyń  salt-dástúrin burmalaý, qorlaý, jáne mazaq etý maqsatymen jazylǵan maqala  jaryq kórgen bolatyn. «Estelik» retinde jazylǵan maqalanyń avtory  Huń Baý: «Qazaq qonaqshyl halyq, qonaǵyn kútkeni sondaı - qonaǵyna qoı soıyp, et berip kútýmen qoımaı, qoınyna uzatylmaǵan qyzyn salyp beredi!» dep, Qazaqtyń salt-dástúrinde joq, Qazaq halqynyń ulttyq ar-namysyna tıetin jalǵan oqıǵany óz basynan ótken shyndyq retinde jarıalady. Huń Baýdyń qazaq halqyn masqaralaýǵa arnalǵan osy ótirigi Qytaı elinde turatyn qazaqtardyń ǵana emes,  babaqonysyndaǵy qazaqtardyń da ashý-yzasyn týǵyzdy. Ókinishke qaraı, bul - QHR saıttarynda qazaqty qorlaý baǵytynda jazylǵan birinshi maqala emes ekenin esterińizge salamyz. Iisi Túrki halqynyń, qala berdi kúlli musylman qaýymynyń namysyn aıaqqa taptaǵan osy jaǵdaıǵa baılanysty búgin (dúısenbi kúni) tańǵy saǵat 10:30 da Astana qalasyndaǵy Qytaı Elshiligine (Qonaev kóshesi men Qabanbaı batyr kósheleriniń qıylsy) elimizdegi saıasat qaıratkerleri men zıaly jurtynan, jýrnalıser men ózge de qoǵamdyq uıymdardyń ókilderinen kóptegen adam qoldap qol qoıǵan narazylyq hatyn tapsyrý sharasyn ótkizýge jınalǵan edik.. QHR halyq úkimetine, QHR syrtqy ister  mınstirligine, QHR-dyń Qazaqstandaǵy Bas elshisine arnap narazylyq retinde jazylǵan ashyq hatty tapsyrý sharasyna Astana qalasynda turatyn aqyn-jazýshylarǵa, jýrnalıserge, stýdentterge, t.b. kópshilik qaýymǵa úndeý tastaǵan edik. Kelýge tıis dep josparlanǵan biraz adamdardyń qalta telefony «baılanys aıasynan tys jerde» bolǵanyn esepke almaǵanda, jýrnalıserden bólek jınalǵan úrkerdeı topqa Qytaı Elshiliginen jolyǵaýǵa arnaıy úsh adam shyqty. Kelgen maqsatymyzdy aıtyp, Huń Baýdyń «shatpaqtarynyń» taza qytaı tilinde shyqqan nusqasynan jasalǵan kóshirmeni, el aǵalary qol qoıǵan ashyq hatty kórsettik. Syrttaǵy jınalǵan qazaqtardyń sesinen jasqandy ma, álde,  ımperıalyq keýdesin kórsetkisi keldi me, qaıdam, antalaǵan jýrnalıserden, vıdo-kameralardan betin qalqalap, tumysyǵyn jaǵasyna tyqqan qytaı «ókilderi» temir qorshaý ishine qaıta qashyp kirdi de,  taıyp turdy. Sóıtip, Astana tórinde, qazaq pen qytaı eki el ortasyndaǵy túıindi máselelerdi sheship, «arbany da syndyrmaı, ógizdi de óltirmeı» elshilik mindetin atqarýǵa tıisti Qytaı Konsýldyǵy qazaqtardyń ashý-yzasyn oıatqan Huń Baýdyń «myljyńyna» baılanysty jazylǵan, memleketaralyq renish týdyrýy múmkin daýǵa aldyn-ala tosqaýyl qoıýdy nıet tutqan ashyq hatty tapsyryp alýdan resmı túrde bas tartty.  

Astana qalasy

"Abaı" aqparat