«KEGOC»  aksıonerlik qoǵamy ózinen alyp, halyqqa elektrqýatyn jetkizetin uıymdarǵa 2014 jyldyń 1 qarashasynan bastap tarıfti 50 paıyzǵa arttyratynyn málimdep otyr. Aıdyń-kúnniń amanynda, ekonomıka turaqty, baǵa ósimsiz bolyp turǵanda baǵany osylaı júgensiz kóterýge bola ma? Álde bul eldegi ekonomıkalyq turaqtylyqty shaıqaltý úshin istelip jatqan jymysqy sharalar ma? Óıtkeni, elektr qýatynyń baǵasy bir jerde artsa boldy barlyq ónimniń de, qyzmettiń de  baǵasy birden kóteriletini sózsiz ǵoı. Osyny bile tura birden 50 paıyzǵa sekirip, basqalar «bul bolmasa kúl bolsyn», ózimiz baıı tússek boldy degen qorqaýlyq saıasat kimniń oıyna keldi eken?

         Shekten shyqqan osy sharany  «KEGOC» basshylary Tabıǵı monopolıalardy retteý jónindegi agenttiktiń 2014 jyldyń 16 mamyrynda shyqqan №105-shi buıryǵyna sáıkes «tótenshe rettegish sharalar» retinde jasap otyrmyz deıtin kórinedi. Demek, osy kompanıaǵa elden ala bóten tótenshe jaǵdaılar kelip qalǵan ba?

Osy máselelerdi Parlament Májilisiniń sońǵy otyrysynda juqalap jetkize kelip, depýtat Nurlan Jazylbekov óziniń Premer-Mınıstr K.Másimovke saýal joldap, osy máseleniń durystyǵyna baǵa berýdi ótinetinin aıtty. «Tótenshe rettegish sharalar» degen «Tabıǵı monopolıalar jáne retteletin rynoktar jónindegi» zańǵa sáıkes halyqty, qorshaǵan ortany, azamattardyń densaýlyqtary men múlkin qorǵaý úshin ókiletti organnyń sheshimimen qabyldanatyn edi ǵoı. Mynalardyń sony ózdiginen qabyldaýyna qandaı qajettilik týǵan, deıdi depýtat saýalynda. Sonymen birge ol bul shara turǵyndar úshin de tarıfti kóterýge soqtyratynyn eskertedi. Depýtattyń bul saýalyna «Aq jol» partıasy parlamenttik fraksıasy ókilderi tegis qol qoıdy.

Endi máseleni Premer-Mınıstr K.Másimov teksertip, oń sheshim qabyldar. Kóringenniń oıyna ne kelse sony istep oıqastaı berýine Úkimet jol bermes degen úmittemiz.

A.Alpysbaev, jýrnalıs