Kópten kútken oraza aıy kelip qaldy. Oraza aıy shaıtandar kisendelip, perishtelerdiń jer betinde kóbeıip, jasaǵan saýaptarymyzdyń nıetimizge qaraı 10-nan 700 esege deıin eselenetin aıy. Kúnniń aptap ystyǵyna qaramaı Allanyń buıryǵyn oryndap júrgenderge jeńildik pen mol saýap bary anyq. Oraza aıyna baılanysty Qamshy aqparattyq agenttigi oı salarlyq ǵıbratty áńgimeler men oraza kezindegi ómirde bolǵan tańǵajaıyp oqıǵalardy kúndelikti oqyrman nazaryna usynatyn bolady. Osy shaǵyn oqıǵalar arqyly ózińiz oı túıip, sabaq alady degen oıdamyz. 

Áýlıe quldardyń orazasy astan tyıylýmen ǵana shektelmegen. Olar aýyz bekitkende boıdy barlyq jaman qylyqtardan aýlaq ustap, rýhanı tazalyqqa kóp kóńil bólgen dep jazady Qamshy aqparattyq agenttigi kazislam.kz-ke silteme jasaı otyryp. Jaratýshy ıeniń razylyǵyn maqsat tutqandyqtan, jyl on eki aıdyń barlyǵyn Ramazan aıyndaı qurmettep, únemi oraza ustaǵan. Aýyz bekitken bir kúni qasyndaǵylar Úndistannyń patshasyn syrttaı ósekke tańdy. Osy sát Dyhláýı: «Qap, orazamdy buzyp alǵanymdy qarashy» dep ókinish bildirdi.  Áýlıeniń bul tosyn qylyǵyna qasyndaǵylar «Aıtylǵan ósek orazany buzatynyn meńzedińiz be, alaıda ósekti siz emes basqalar aıtqan joq pa?» dep tańyrqaǵanda, ol «Ǵaıbat – aıtýshyǵa da, tyńdaýshyǵa da ortaq» degen maǵynadaǵy hadıspen jaýap berdi.  

30 kúndik oraza kózdi ashyp-jumǵansha ótip ketetini belgili. Sondyqtan sizge berilgen keremet múmkindikti paıdalanyp qalyńyz. Eger ǵaıbat sózderdi jıi aıtatyn bolsańyz odan osy oraza aıynda tyıylýǵa tyrysyńyz. Sebebi osy aıda jaman ádetterden tyıylý ózge aılarǵa qaraǵanda áldeqaıda jeńil bolady. Orazańyz qabyl bolsyn!

Daıyndaǵan: Ásel Óteshova