37 jastaǵy Stefanı Deker 5 jyl buryn balalarynyń ómirin saqtap qalý úshin óz densaýlyǵyn qurban etti. Dekerler otbasy turatyn Genrıvıll qalashyǵynda tabıǵat apaty boldy. 2012 jyly quıyn kelip jolynda kezdeskenniń barlyǵyn qıratyp, shaıyp ketip otyrdy. Stefanı dál sol kezde balalarymen úıge kirgen edi. Áıel balalaryn birden jertólege aparýǵa bekinedi. Alaıda terezeniń janynan ótip bara jatyp aýladaǵy batýt shar sekildi aspanǵa ushyp bara jatqanyn baıqaıdy. Terezeler synyp, úı qulap ketetindeı bolǵan. Qaýipsiz jerge barýǵa úlgermeıtinin bilgen Stefanı balalardy tósenishke orap, ózi ústine jatyp alady. Anasy balalaryn denesimen jabý arqyly qyzy men ulynyn ómirin saqtap qalǵan.

Stefanılerdiń úıine tornado kelip, barlyǵy qırap jatqanda úı qırandylary jan-jaqqa ushyp jatty. Balalarǵa eshteńe bolmady. Sebebi barlyǵyn anasy kóterdi.

Bolat baǵan áıeldiń aıaǵyna túsip, aıaǵyn mort syndyryp jiberdi. Sonymen qatar, dárigerler Stefanıdiń ókpesi zaqymdanǵanyn jáne birneshe jerinde súıegi synǵanyn anyqtaǵan. Balalarynyń densaýlyǵy men ómirin saqtaý úshin ózin qurban etken ananyń aıaǵyn dárigerler saqtap qala almady. Ony kesýge týra keldi.

Deker Stefanı kúıeýi men balalarynyń qoldaýy men demeýiniń arqasynda qalypty ómirge qaıta kelgenin aıtady. Óz isine eshqashan ókinbeıtinin jáne baýyr eti balalary úshin ómirin de qurban etýge daıar ekenin, olardyń densaýlyǵy úshin qaıta sol áreketti jasaýǵa daıyn ekenin aıtady.

Osy jaǵdaıdan keıin Stefanı Deker múgedekterge qol ushyn beretin qor ashty. Qazir ol júre almaıtyn jandarǵa kómektesip, qoldaý kórsetip júr.

Stefanı ótken jaǵdaıdan keıin ómirge degen kózqarasy túbegeıli ózgergenin jáne buryn ózi úshin qymbat dep oılaǵandarynyń kóbiniń eshqandaı mańyzy joq ekenin túsingenin aıtady. 

Daıyndaǵan: Ásem Álmuhanbet