Bıyl belgili din ǵulamasy, qoǵam qaıratkeri, biregeı tulǵa Haıfa Altaı Ǵaqypulynyń 100 jyldyǵy. Ataýly mereıtoıǵa oraı, respýblıkamyzdyń jer-jerinde Túrkıa, Qytaı jáne Eýropanyń birqatar elderinde tulǵanyń tuǵyryn bıiktetýge arnalǵan alqaly jıyn, basqosýlar ótýde. Solardyń biri Túrkilerdiń rýhanı astanasy sanalatyn kıeli Túrkistan shaharynda boldy. H.A.Ǵaqypuly ıslam dinin ýaǵyzdap, dinı kitaptar aýdaryp, ımanı kitaptardy taratýǵa eńbek sińirgen. Qasıetti Qurandy qazaq tiline eń alǵash aýdarǵan ǵulama ǵalym halyqtyń rýhanı sanasyn jańǵyrtqanedi.
Ahmet Iasaýı ýnıversıtetinde «Er Jánibek» Halyqaralyq qoǵamdyq qorynyń qoldaýymen ǵulama ǵalym, dinı aǵartýshy qaıratker Halıfa Altaı Ǵaqypulynyń 100 mereıtoıyna oraı «Halıfa Altaı ıslamnyń kórnekti ǵulamasy» atty tanymdyq konferensıa ótti.
Shara shymyldyǵy Halıfa Altaı Ǵaqypuly jaıly derekti fılmmen ashyldy. Rýhanıat shamshyraǵy Halıfa Altaı qajynyń ónegeli, úlgili taǵdyry eske alyndy.
«Er Jánibek» Halyqaralyq qoǵamdyq qorynyń prezıdenti J.Túrkıa, Túrkistan qalasynyń ákiminiń orynbasary Ǵ.Rysbekov, asyldyń synyǵy, uly A.Altaı sóz sóılep, shara mańyzyn, Halıfa Altaıdyń óshpes ónegesin aıtty. Memleket tarıhy ınstıtýtynyń jetekshi ǵylymı qyzmetkeri, t.ǵ.k., Q.Erimbetova «Qazaqtyń tektilik fenomeni» (Halıfa Altaı mysalynda) atty baıandama jasady. Shara qonaǵy, QMDB-nyń respýblıkalyq aqparattyq-nasıhat tobynyń múshesi, ıslamtanýshy A.Qýanyshbaev «Quran Kárim. Qazaqsha maǵyna jáne túsinigi» kitabynyń naǵyz ǵylymı-akademıalyq aýdarma ekenin aıtty. Barsha musylman qaýymy qaýyshatyn qasıetti Ramazan aıymen quttyqtady.
Marapattaý rásiminde, Ǵ.Rysbekov Túrkistan qalasynyń ákimi Á.Sh.Óserbaev atynan Abdýrahım Altaıǵa syı-syıapat tabystap, shapan japty. Sonymen qatar, ǵylymı sharanyń joǵary deńgeıde ótýine atsalysqandardy qala ákiminiń alǵys hatymen marapattady.
Uıymdastyrý jáne tárbıe isteri jónindegi vıse-prezıdent, profesor B.Mýhamedjanov musylmandyqtyń moıymas jarshysy Halıfa Altaı jaıly ǵıbratty áńgime aıtyp, konferensıa qonaqtaryna oqý orda atynan syı-syıapat, alǵys hat tabystady. Atap aıtsaq, ıslamtanýshy A.Qýanyshbaev, t.ǵ.k., Q.Erimbetova, D.Shaımuranuly, «Túrkistan-Ahmet Iassaýı» meshitiniń naıb ımamy Súleımen qarı, A.Týkaev, t.b., marapattaldy.
Sondaı-aq, konferensıa aıasynda ortalyq «Túrkistan-Ahmet Iassaýı» meshitinde ótken Quran oqý sheshýshi jarysynyń jeńimpazdary marapattaldy. İ oryn ıegeri Jaqsylyq Mustafaǵa «Er Jánibek» Halyqaralyq qoǵamdyq qorynyń, İİ oryn ıegeri Aıtmahan Dıasqa «Áziret Sultan» memlekettik tarıhı-mádenı murajaıynyń, İİİ oryn ıegeri Nurmuhammed Jumabaıǵa, Qasym Rozhanǵa HQTÝ júldesi tapsyryldy. «Ádemi áýezdi qarı» nomınasıasyn Sherefı Hamza, «Jas qarı» nomınasıasyn Shaımerden Jomart ıelendi.
Sharanyń kelesi kezegi belgili ádebıet synshysy, ǵalym Qulbek Ergóbek qurǵan Túrkitildes halyqtardyń kitaphanasynda jalǵasty. Qonaqtar talaǵan kitaphanada Halıfa Altaıǵa arnalǵan kitap bóligin tamashalap, ǵulamanyń shyǵarmalarymen taǵy bir bet kóristi. Sonymen birge, kitaphanaǵa "Er Jánibek" halyqaralyq qory shyǵarǵan kitaptar tabys etildi. Shara aıasynda jas zertteýshi, ómirden erte ketken marqum Erbol Raıhannyń kitap buryshyn ashý rásimi ótip, lentasy qıyldy. Sharaǵa belgili dintashýy Muhan Isahan da qatysty. Osy retki sharany uıymdastyrýǵa belsendi atsalysqan azamattyń biri Nóserbek Janádil jalpy is-sharanyń mán-mańyzy týraly aıta kelip, jas zertteýshi Erbol Raıhannyń ómiri men atqarǵan eńbegi týraly aıtyp berdi. Jıyn sońy ýnıversıtettiń asqanasynda 500 stýdentke arnap jaıylǵan as dastarqanymen aıaqtaldy.
Ózkezeginde Abdýrahım Altaı da ıgi sharanyń ótýine muryndyq bolǵan Nóserbek Zańádil bastaǵan uıymdastyrý alqasyna, ýnıversıtet ujymy men demeýshilerge rızashylyǵyn bildirip, alǵysyn aıtty.
Jarqyn Janaltaı
