Asa qamqor erekshe meıirimdi Allanyń atymen bastaımyn!
Qazaqstan musylmandary dinı basqarmasynyń negizgi jumys baǵyttarynyń biri – dinı máselelerde pátýa shyǵarý. Bas múftı Erjan qajy Malǵajyuly laýazymdy qyzmetke saılanǵan sátten bastap QMDB Ǵulamalar Keńesine qoǵamda kórinis tapqan ózekti dinı máselelerge qatysty der kezinde pátýa berýdi tapsyrǵan bolatyn. Solardyń biri – álem musylmandarynyń alańdaýshylyǵyn týdyrǵan jalǵan senimdi sanaǵa sińdirýge tyrysqan «Tákpirshiler» jamaǵaty. Olar adamdardy senim men kúpirlik (taýhıd pen shırk), birqudaılyq pen serik qosý (ıman men shırk) máselesinde adastyryp, kápirge shyǵarýda. «Taza Islam», «taza Taýhıd» degen sózderdi betperde etken jamaǵat ókilderi jastarǵa jarqyn bolashaqty ýáde etip, búlikke bastaıdy. Qazaqstan musylmandary dinı basqarmasy 2013 jyly 7 qarashada «Tákpirshilerge» qatysty shyǵarǵan pátýasynda «tákfır – dinge engen jańalyq» ekeni týraly úkim berildi. Bul pátýa buqaralyq aqparat quraldarynda jarıalandy. Senimde shekten shyqqan tákpirshilerdiń áreketi musylmanshylyqqa múldem jat. Dinı basqarma Sırıadaǵy soǵysqa ne úshin barǵanyn bilmeıtin, maqsaty aıqyn emes jastardy mundaı fıtnaǵa (búlinýshilikke) qatyspaýǵa shaqyrady. Búginde Sırıa halqy beıbitshilikti ornatý sharalaryna ári búkil musylman úmmetiniń shynaıy janashyrlyǵyna muqtaj. Ondaǵy zorlyq-zombylyq áreketter men daýly máseleler beıbitshilik jolymen sheshilýi tıis.
Qoǵamda kórinis tapqan taǵy bir másele – jıhad uǵymy. Keıbir adamdar jıhad uǵymyn qolǵa qarý alyp, soǵysqa attaný dep túsinedi. Birinshiden, sharıǵatymyzda ımamnyń (memleket basshysynyń) ruqsatynsyz soǵysqa shyǵýǵa tyıym salynǵan. Ekinshiden, ózge eldiń ishki máselesine aralasýyna eshkimniń quqyǵy joq. Ár musylman memleketiniń pátýa beretin resmı dinı basqarmasy jáne múftıi bolady. QMDB-nyń jıhad týraly shyǵarǵan pátýasynda teris pıǵyldy, radıkaldy aǵymdardyń arbaýynda júrgen jastardyń Dinı basqarmanyń, ata-ananyń ruqsatynsyz ózge elge jıhadqa attanýy durys emes ekendigi jaıly úkim aıtyldy.
Sharıǵat boıynsha hıjrat jasaýdyń sharty, onyń úkimi týraly da Dinı basqarmanyń pátýasy shyqqan bolatyn. Islamdaǵy bes paryzǵa (ıman, namaz, oraza, zeket, qajylyq jasaý) tyıym salynsa, azan aıttyrmasa, meshitter túgelimen jabylsa jáne musylmandardyń meıramdaryn atap ótýge shekteý qoıylsa, onda musylmanǵa óziniń dinin saqtaý úshin basqa elge kóshýi mindet etiledi. Al bizde, Qudaıǵa shúkir, záýlim meshitter kúnnen-kúnge kóbeıip, dinı meıramdar keńinen toılanyp keledi. Máselen, dinimizdiń janashyry Elbasynyń permenimen Qurban aıt meıramy demalys kúni bolyp jarıalandy. Bul musylmandardyń ulyq merekesine kórsetilgen qurmet dep bilemiz.
QMDB-nyń hıjrat jasaý týraly 2013 jyldyń 7 qarashasynda berilgen pátýasynda Islamnyń negizgi rámizderi men rásimderin atqarýǵa ruqsat etilgen memleketten ózge elge kóshýge eshbir qajettilik joq degen sheshim shyǵarylǵan.
Ershat OŃǴAROV,
QMDB Ýaǵyz-nasıhat bóliminiń meńgerýshisi
Qamshy-aqparat
