Bir qoıshy qart qoılaryn óristetip, jaıylymǵa jaıǵan saıyn dóńge jaqyn ósken bir alma aǵashynyń túbine baryp dem alatyn, dep jazady Qamshy aqparattyq agenttigi. Eger jemis pisken mezgil bolsa, alma aǵashymen tildesip: – Qane, balam, qarttyń almasyn bere ǵoı, – deıtin. Sóıtkenshe bolmaı, dámi til úıiretin, ısi ańqyǵan, balbyrap pisken bir alma jerge top ete túsetin. Qart bolsa, kishkene bákisimen álgi almany asyqpaı tilimdep kesip, ózimen birge ala kelgen torsyǵyndaǵy aıranymen qosa sál júrek jalǵaǵannan keıin ákesinen qalǵan Quranyn bappen qolǵa alyp, jaılap oqı bastaıtyn.

Qoıshy qart bul alma aǵashyn osydan jıyrma jyl buryn otyrǵyzǵan kezde jıi-jıi sýǵaryp, namaz aldynda beti-qolyn shaıǵan dáret sýynyń qalǵanyn da yrymdap sonyń túbine tógetin. Qart júzin shaıǵan sol sýdyń sharapaty tıdi me, áıteýir, alma aǵashynyń tamyry tez jan alyp, az ýaqytta-aq boı kóterip, jemis bere bastady. Qoıshy qart ol kezde jas bolǵandyqtan qaı ádemi almaǵa kózi túspesin, sál umsynyp qol sozǵany jetip jatyr edi. Alaıda odan bergi qanshama jyl ishinde qarttyń boıy alasaryp, beli búgildi, al alma aǵashynyń boıy kerisinshe barynsha bıiktep, shynar aǵashyndaı jaıqalyp ketken-di. Biraq alma aǵashy qansha jaıqalyp óskenimen mápelep ósirgen balanyń aty bala emes pe? Ony balasyndaı kóretin qart aǵash butaqtaryn alaqanymen jaı ǵana sıpap turyp:

– Qane, balam, búgingi nesibemdi túsire ǵoı? - deıtin.

Aıtqanyndaı, kóp pálsinbesten bir alma túsýshi edi. Bul kórinis dál osy qalpynda birneshe jyldan beri qaıtalanyp kele jatqan-dy. Tipti qart suraǵanda, almanyń túspeı qalǵan bir de bir kúni bolǵan emes.

Aýyl adamdary bolsa, tańǵajaıyp bul qubylysty syrttaı birneshe márte baıqap, qoıshy qartty «áýlıege» jorysyp qoıǵaly qashan.

Qart kisi aǵash kóleńkesinde azdap tynyǵyp, namazyn oqyǵannan keıin ádettegideı sol kúngi almasyn surady. Alaıda, bir tańǵalarlyǵy, aǵash butaqtary jemiske tolyp tursa da, qart qolyna eshteńe túspedi. Qart óz qalaýyn qansha qaıtalaǵanymen báribir eshteńe bola qoımady. Kútkeni oryndalmaı, kirpigi men saqaly taram-taram jasqa shylanǵan qart únsiz ǵana alystap qoılaryna ketip bara jatty.

Jemis bergeli balasy qart kóńilin esh qaldyryp kórgen emes edi. Mápelep ósirgen balasyna dál osy joly qatty renjidi. Kóńli qulazyǵan qarttyń boıy tipti shókimdeı bop, beli de buryńǵydan beter búkshıe túskendeı.

Maldaryn qaıyryp, aýylǵa bet alǵanda meshitten áýelep shyqqan azanǵa qulaq túrdi. Azan óte bir erekshe, áýezdi únmen oqylyp jatqandaı. Tipti astarynan qýanysh ta seziletin sekildi. Birden irkilip, boıyn jınap ala qoıdy. Qart baıǵus ómirge qaıta kelgendeı kúı keshti. Óıtkeni, esine bir nárse túsken edi.

Bul joly kózine qýanyshtan jas alyp, balasha máz bolǵan qart álgindegi alma aǵashyna jetkenshe asyqty. Kele sala ony aınalyp-tolǵanyp, keń qushaǵyn tóseı qushaqtaǵan qart: – Kúnim, ásheıin, – dedi ıegi kemseńdep jylaǵan kúıi, – aınalaıyn, balam, jaryǵym! Umytshaq men baıǵusty renjitpeı turyp-aq bildirseń bolmas pa edi?! Búgin Oraza aıynyń alǵashqy kúni eken ǵoı?!

Sholýshy: Ásel Óteshova