AQSH-tyń Mıssýrı shtatynyń turǵyny, bastaýysh synyp muǵalimi Lorın Floger júktilikti ázirshe josparlamaǵan edi. Onyń bir qyzy boldy. Dese de, áıel júkti ekenin bilgende kúıeýi ekeýiniń baqytynda shek bolmady. Qyzy da sińlisi nemese inisi bolatynyna qatty qýanǵan.

Otbasylyq jup bala dúnıege kelgennen keıin kelesi kúni halyqqa tanymal bolamyz dep úsh uıyqtasa túsine de kirmedi.

Lorın júktiliktiń 20-shy aptasynda uldy bolatynyn bilgen. Dárigerler sharana iri bolatynyn boljaǵan. Bul habarǵa muǵalim tańqalmady. Sebebi onyń otbasyndaǵy jigitterdiń kóbi aýyr salmaqpen dúnıege kelgen eken. Dese de, Lorın de kúıeýine alyp batyrdy tartý etemin dep oılamady.

Áıel tabıǵı jolmen bosandy. Jýrnalıserge bergen suhbatynda Lorın bosanǵanda aýyr bolǵanyn, alaıda shydaýǵa keletinin aıtqan. Onyń ústine bosanǵan ýaqytta qasynda kúıeýi bolǵan.

Dárigerler sábıdiń salmaǵyn ólsheı almaı otyrǵanda Lorın alyp balany dúnıege ákelgenin túsingen. Dárigerler jertóledegi eski tarazyny alyp kelýine týra kelgen. Kishkentaı Fıniń salmaǵy 6 keli ekeni anyqtaldy.

Buǵan qatysty balada da, anada da eshqandaı qıynshylyqtar bolmady. Qazir Fınge 3 apta boldy. Osy ýaqyt aralyǵynda ol biraz ósip úlgergen. Anasynyń aıtýynsha Fın kún sanap emes, saǵattap ósip jatyr.

Balanyń salmaǵy Lorınniń týystaryn da tańqaldyrdy. Áıeldiń ápkesi qaljyńdap óziniń jeńilgendigin aıtyp, budan úlken balany dúnıege alyp kele almaıtynyn aıtqan. Flogerler otbasy ómirindegi eń baqytty kúnderdi bastan ótkerip jatqanyn jetkizedi. 

Daıyndaǵan: Ásem Álmuhanbet