"Ekspo-2017" halyqaralyq kórmesi taıap keledi. Bári saqadaı-saı, elordanyń jyrtyǵy jamalyp, artyǵy ózge aımaqtarǵa jóneltildi. Qansha aıdan beri qurylysshylar typyrshyp, jol jóndeýshiler uıqylaryn umytyp, eńbek etýde. Eske sala keteıik, jaqynda ǵana astanalyq qańǵybastardyń bári derlik Kókshetaýǵa qýylǵan. Qala birshama tazaryp qalǵan bolar. Alaıda osyndaı daıyndyqtarǵa ashynǵan qazaqtardyń da qarasy kóbeıýde. Máselen, kúıingen astanalyq turǵyn óz oıyn ınstagramdaǵy paraqshanyń birine jarıalapty. Mazmuny tómendegideı:  

«Qurmetti astanalyqtar, 10 qyrkúıekke deıin jóni túzý kıimderińdi kıip júrińder. Tipti, úı mańyndaǵy dúkenniń ózine ádemi kıinip shyǵyńdar. Bolmasa, Kókshetaýdyń kóshelerinen biraq shyǵasyńdar. Dostym, abaı bol! Óz taǵdyryńa óziń balta shappa. Qoqys jáshiginiń janyna múldem jolama. Úıińde qoqys jınalyp qalsa da barma. 10 qyrkúıekten soń bárin birge tastaı salasyń.

Bazarlardy múldem jaýyp tastaý kerek. Biz damyǵan 50 memlekettiń qataryna kirdik emes pe? Qandaı bazar? Sheteldik qonaqtar bizdi «Hanshatyr» men «Kerýende» saýda jasaıdy dep oılaýy tıis emes pe? Dál osylaı isteseńizder, «naǵyz astanalyqtar» degen atpen barlyq BAQ ókilderi jazatyn bolady sizder jaıly. Kútińizder! Biz óte qonaqjaı bolyp kórinýimiz múmkin. Eń bastysy, qonaqtarymyz rıza bolsyn.

Al bizdiń baýyrsaqtar men shelpekterdi EKSPO ýaqytynda sheteldiń eń myqty degen mamandary daıyndaıtyn bolady. Bári etıkaǵa, estetıkaǵa saı bolýy qajet.

11 qyrkúıekte qonaqtar ketkennen keıin ózimiz otyryp shaı ishemiz. Tipti, dorbaǵa salatyn sarqyt ta bolady. Ol EKSPO-nyń búdjetinde kózdelgen.

Eń durys sheshim, astanalyqtar 10 qyrkúıekke deıin qaladan ketýi kerek. Sebebi olar ózderiniń bilmestikteriniń kesirinen EKSPO merekesiniń shyrqyn buzýy múmkin.

Qonaqtar kele jatqanda balalarǵa aıtady ǵoı: «Áı, sender dalaǵa baryńdar! Qazir qonaqtar keledi!» Qudaıǵa shúkir, keń dalamyz bar! Baratyn jerimiz joq emes!»

Sholýshy: Sabına Ramazan