Estelik – memýarlyq ádebıettiń bir úlgisi bolyp sanalady. Ol kóz kórgen, aldynan ótken naqtyly aqıqatqa qurylyp, jazylady. Iaǵnı, týra, búkpesiz janr túri. Qolyna qalam ustaǵan jazýshylardyń qaı-qaısysy bolmasyn kórgen-bilgenin, estigenin hám basynan ótken oqıǵasyn estelik etip jazady. "Adamzattyń Aıtmatovy" atanǵan álem jazýshysy Shyńǵys Aıtmatovtyń sondaı bir qyzyqty oqıǵasyn oqı otyryńyzdar!
Jambyl qalasynyń maldárigerlik tehnıkýmyna túsken kezim. Kúndelikti leksıamen tájirıbelik sabaqtar da qatar júredi. "Konevodstvo", "Ovsevodstvo" degen taraýmen birge, ózge tórt túlik mal quryp qalǵandaı, "Oslevodstvoǵa" oıystyq. Oqytýshymyzdyń ulty orys, soǵys jyldary Lenıngrad qorshaýynda bolyp, Qazaqstanǵa kóship kelgen, óte bilimdi, qatal ári qart adam edi. Tájirıbelik sabaq ótkizýge tehnıkýmnyń qosalqy sharýashylyǵynda esek joq. Sondyqtan profesor stýdentterdi Jambyldyń "Atshabar" mal bazaryna alyp baratyn. Qalanyń tóńiregindegi aýyldardan, qyrǵyzdyń Talasynan mal aıdap ákelip satatyndar senbi, jeksenbi kúnderi sapyrylysyp, yǵy-jyǵy bop jatatyn.
Birde bazardyń qaq ortasynda shybyndap turǵan kók esektiń janyna kep toqtadyq.
— Stýdent Aıtmatov, bul esektiń qaı túri? Káne, baıanda, — dep, kózáınegi jarqyldaǵan profesor bir top stýdentterdiń ishinen maǵan burylsyn.
— Bul maqulyq alǵash Afrıka men Azıa qurlyǵynda paıda bolǵan. Myna ózderińiz kórip turǵandaı, esekter ózge maldardan qulaǵynyń uzyndyǵymen erekshelenedi. Qodyǵyn on eki aı kóteredi, — deı bergenim sol edi, álgi bar bolǵyr, kók esektiń ıesin tanı kettim.
Aýyldaǵy Dosaly jezdem men Qaraqyz apamnyń kórshisi. Esekke qaraı eminip turǵan meni kórip, tańdana qaraıdy. Uıattan mundaı órtenbespin. Tipti daýsym shyqpaı, qumyǵyp qaldy. Álgi aqsaqal Shekerge barysymen:
— Oıbaı, Tórequldyń balasy Jambylda esektiń oqýyn oqyp júr eken. Muǵalimimen birge bazarda baılaýly turǵan meniń esegimniń aldyna kelip, onyń shyqqan teginen bastap tuqym-tuıaǵyn, jeti atasyn túgeldeı sanap shyqty.
Balanyń sózine men turmaq, kók esegim de rıza bolsa kerek, — dep, búkil aýylǵa jyr etip taratsyn.
Artynsha aýylǵa demalysqa kelgenimde, Qaraqyz apam:
— Osy jurt seni esektiń oqýyn oqyp júr deıdi ǵoı. Bul ne áńgime, qaraǵym-aý. Basqa oqý quryp qaldy ma? Alda-jalda esekti oqyǵyń kelip bara jatsa, osy aýylda esekten kóp nárse joq emes pe? — degeni kóńili buzylyp…
Derekkóz: massaget.kz
Sholýshy: Gúlim Jaqan
