Senimdilik medeý beredi, al bıznestegi senimniń mańyzy zor
Bul týraly «Atameken» UKP Tóralqa Tóraǵasy Tımýr Qulybaev UKP İsker áıelderi keńesiniń Astanada ótken Kongresinde aıtty.
«Qyz-kelinshekterdiń qyzmetker retinde, bıznes jetekshisi retinde er azamattardan ereksheligi bar. Máselen, derekter alý, esepter, býhgaletrlik nemese qarjylyq esepteýler qajet bolsa, onyń bári eńbekqor áıelder qolymen jasalady. Áıelder shyn máninde jumysqa bar bilimin salyp, kásibı turǵyda kirisedi, jumysty berilip isteıdi. Aıta keteıin, senimdilik medeý beredi, bıznestegi senimdilik – basty qaǵıdalardyń biri. Elimiz Shyǵys halqy bolýyna qaramastan shaǵyn jáne orta bıznestiń 42%-yn áıelder basqarady. Bul rette bilim men tájirıbe almasý mańyzdy. Ókinishke oraı, bıznes turǵysynan alǵanda Qazaqstan jas memleket bolyp sanalady. Meniń zamandastarym kásipkerlikpen aınalysqan ári óz qatelikterinde shyńdalǵan alǵashqy býyn bolyp sanalady. Búginde iskerlik bilim alýda joǵary oqý oryndary bar, «Bolashaq» baǵdarlamasy bar. Otbasyn uıytyp, bala tárbıeleýmen qatar bıznesin de dóńgeletip jatqan áıelder balalary úshin naǵyz úlgi. Balalar analaryna qarap bıznestiń qajettiligin erte túsinedi. Bul kásipkerliktiń ómirlik mektebi», – dedi Tımýr Qulybaev.
Tóralqa Tóraǵasy áıelder kásipkerligi Ulttyq palatanyń jiti nazarynda bolýy kerek ekenin atap ótti. «İsker áıelder keńesiniń kúshi – birlikte. Búginde ár óńirde İsker áıelder keńesiniń ókildigi bar. Bul búkil respýblıka kásipkerlerimen keri baılanystyń baryn aıqyndaıdy. Búkil bıznes úshin, onyń ishinde áıelder kásipkerligi úshin qarjy qoljetimdiligi mańyzdy. Bul máseleni mıkro nesıeleý uıymdary arqyly sheshýge tyrysýdamyz», – dedi Tımýr Qulybaev.
Eske salsaq, 2016 jyly «Atameken» 6 óńirde, ıaǵnı Almaty, Aqtóbe, Qyzylorda, Mańǵystaý, Jambyl, Qostanaı oblystarynda shaǵyn nesıe berýdiń pılottyq jobasyn iske qosty.
Shaǵyn qarjy ortalyǵy kepildikke jyljıtyn/jyljymaıtyn múlik, jer ýchaskesin, avtokólik, aýyl sharýashylyǵy tehnıkasy men jadbyǵyn ala otyryp, «jumsaq» saıasatty ustanady. Nesıe berý týraly sheshimdi bıznes qoǵamdastyq ókilderinen turatyn Óńirlik keńes qabyldaıdy. Bul pılottyq joba búginde Nátıjeli jumyspen qamtý jáne jappaı kásipkerlikti damytý memlekettik baǵdarlamasynyń negizine alyndy. Baǵdarlama aıasynda 7 jylǵa 6% mólsherlememen 18 mln teńgege deıin somada nesıe berilý qol ǵa alyndy.
«Atameken» Ulttyq kásipkerler palatasy munymen qosa «Bastau Bıznes» jobasyn iske qosty. Bıyl joba aıasynda 15 myń jumyssyz jáne ózin-ózi jumyspen qamtyǵan aýyl turǵyndary kásipkerlik negizderine oqytylady. Ol úshin 80 aýdanǵa 1 mlrd 200 myń teńge qarajat bólingen. Nátıjesinde bıylǵy jyly 3000 kásipkerlik sýbektisi ashylýy kerek. Al kelesi jyldan bastap «Bastau Bıznes» jobasynyń aýqymy keńeıip, qatysýshylar sany ulǵaımaq. 2021 jyly 30 myń turǵyn qamtylyp, keminde 6000 bıznes iske qosylýy kerek. Bul maqsat úshin jyl saıyn 2 mlrd 400 mlrd teńge bólinbek.
«Endi bilim alǵan aýyl turǵyndary óz bıznesin qalaı júrgizip, otbasyn qalaı asyraý kerektigin biledi. Munyń mańyzy óte zor jáne jaǵymdy oqıǵalar oń áserin tıgizeri anyq. Jetistigine kýá bolǵan jaqyndarynyń kókireginde jeke kásippen aınalysyp, otbasyn baǵýǵa degen senim uıalaıdy. Bul jeke kásippen aınalysýǵa yntalandyratyny anyq. Al «Atameken» árdaıym qoldaý kórsetýge daıyn», – dedi Ulttyq palata basshysy.
Kongres barysynda «Atameken» UKP Tóralqa Tóraǵasy Tımýr Qulybaev İsker áıelder keńesiniń tórt múshesine «Óz isine adaldyǵy úshin» Ulttyq palatanyń İİİ dárejeli medalin tabystady.
Aıta keter bolsaq, «Atameken» UKP İsker áıelder keńesin qurýdyń basty ıdeıasy – óńir áıelderiniń iskerlik ortadaǵy belsendiligin kúsheıtý. Áıel-kásipkerlerdiń ekonomıkalyq belsendiligin yntalandyrý, áıelderdiń jeke kásipkerlikke aralasýyn, olardyń ekonomıkalyq bastamalaryn qoldaý jáne ekonomıkalyq múmkindikterin keńeıtý keńestiń basty mindeti. Uıymda 700 -den astam kásipker áıel múshelikte.
