Belgisiz qyz bala óziniń basynan ótken áńgimesin baıandap berdi. Orys saıtynda jarıalanǵan bul oqıǵa kimniń bolsa da júregin eljiretip, adam ómirindegi mańyzdy qadamdardy jasaýǵa járdemin tıgizýi múmkin.
Áýelde qyz bul jaıynda jazǵysy kelmegen, alaıda úlkenderdiń aqylymen jarıa etýdi jón sanapty.
«Oqıǵa ótken sársenbide oryn aldy. Ýnıversıtetke bara jattym. Ádettegideı keshigip baramyn. Adamǵa toly vagonnyń ishinde mýzyka tyńdap, alda bolatyn memlekettik emtıhanymdy oılap kelemin.
Janymda eki adam turdy, biri ádemi tondaǵy áıel men palto men jún bas-kıim kıgen, moıyn oramaly bar er adam. Álgi er adam vagonda áreń tur, tipti qulap keter me eken dedim. Qulaqqabymdy sheship, eki adamnyń áńgimesin tyńdaıyn dedim. Er adam iship alǵan sekildi boldy, biraq iship alǵan adamnan ıis múńkim turatyn edi. Bul kisiden múldem baıqalmady, tańqaldym.
Vagonnan birge shyqtyq. Moıyn oramal taqqan er adam áreń qozǵalyp keledi. Bir qatelik jiberse, poıyzdyń astyna túsip qalatyndaı... Ne isterimdi bilmeı dalmyn. Jaraıdy, iship alsa, óz obaly ózine dedim de, óz jónimmen júrip kettim.
Ne kerek, dátim shydamady, álgi adamnyń janyna qaıta keldim. Kómek kerek emes pe eken dep suradym. Er adamnyń jaýaby túsiniksiz boldy, sóz ben sózdi, sóılem men sóılemdi baılanystyra almady. Úreıim qashty, er adam da menen kózin almaı qarap tur.
Áleýmettik jelide ınsýlt jaıynda oqyǵanym bar edi, aıaq asty sol esime tústi. Álgi adamnan kúlýin ótindim. Ótinishim oǵash estiler, biraq men solaı istedim. «Kúlińizshi?! Ádemi qyzǵa qarap, kúlý de qıyn ba?». Ol kúlýge tyrysty. Biraq jartylaı ǵana.
Qudaıym-aı, jartylaı ǵana, iship almaǵan, bul – ınsýlttiń belgileri! Sóıtip, ony oryndyqqa jatqyzyp, jedel-járdem shaqyrdym. Er adam kóz aldymda solyp barady. Denesi jaýrap, túri bozaryp qalǵan. Bireý kelip kómekteser degen nıetpen aınalama qaradym. Joq, árkim óz jolymen, áıetýir bir jerge asyǵyp barady, jan-jaǵyna qaraýǵa múmkindikteri de joq. Biraz ýaqyttan soń jedel-járdem de jetti, er adamdy zembilge salyp, adamdardyń arasynan ótpek boldy.
Iá, túsinemin, dál keptelis ýaqyty. Árkim úıine asyǵady, ýaqyttary tapshy. Biraq zembilde aýyr halde jatqan er adam da olardy oılandyra almaǵany ma? Eshkim jol berer emes. Birneshe adamdy kórdim vagonnan, biraq jandary joq...
Birer saǵattan soń jedel-járdemnen habarlasyp, er adamnyń qaza tapqanyn aıtty, sebebi kómek der kezinde kórsetilmegen. Men tipti onyń esimin de bilmeımin.
Biraq birnárseni anyq bilemin. Birneshe adamnyń kóz aldynda, esh kómeksiz men de ómirden ótip ketedi ekenmin. Qınalsam da, maǵan eshkim toqtamaıdy, qol ushtaryn sozbaıdy. Múmkindikteri bar, biraq qoldanbaıdy. Ózime jáne bir qudaıǵa senýime ǵana týra keledi.
Qurmetti, adamdar. Óz oılaryńyzdan bir sátke demalyp, aınalaǵa qarańyzdarshy? Janyńyzdaǵa adamdardyń sizdiń kómegińizge muqtaj ekenin kóresiz. Ol adam ishkish bolsyn, nashaqor bolsyn, psıhıkalyq aýrýǵa shyldqqan bolsyn, ol da qudaı jaratqan adam balasy. Tipti qorqamyn dep te oılamańyz. Siz ony qutqara alasyz, eń bolmaǵanda jaqsylyq jasaýǵa tyrysasyz. Sony oılańyz!
Taǵy aıtarym... Insýltke shaldyqqan adamdy tanýdyń 4 qadamy bar:
-adamnan kúlýin surańyz (ol muny durys isteı almaıtynyn kóresz);
-bir sóz aıtýyn surańyz (áripterdi bir-birimen baılanystyra almaıtyn bolady);
-eki qolyn kóterýin surańyz (ony da isteýge qaýqary jetpeıdi);
-tilin shyǵarýyn ótinińiz (tili buralyp turady).
Adamnan atalmysh belgilerdi baıqasańyz, tez arada kómektesýge qulshynyńyz. Siz onyń qutqarýshysy bolýyńyz múmkin. Esińizde bolsyn, ol adamnyń ornynda siz de bolýyńyz áben múmkin».
Sholýshy: Gúlim Jaqan
