Áleýmettik jelide qoldanýshylar «Foreign Policy(Syrtqy saıasat)» jýrnaly saıtynyń ashylmaı qalǵanyna nazar aýdardy dep jazady Qamshy.kz.
Qamshy tilshisi atalǵan jýrnaldyń web beti Qazaqstanda nege ashylmaı turǵanyn izdenip kórdi.
Jahandyq saıasat, ekonomıka, ıntegrasıa taqyryptaryn jazatyn, eki aıda bir basylyp shyǵatyn tanymal jýrnalda 15 maýsymda Qazaqstan týraly maqala shyqqan. «Qazaqstan Ólim Juldyzyn jasaýǵa 5 mıllıard dollar jumsady biraq ol lazermen ata almaıdy» dep atalatyn maqalada EXPO-nyń bas nysany «Nurly álem» ulttyq pavılony «Ólim Juldyzyna» teńelip, mysqylǵa alynǵan. «Ólim juldyzy – «Juldyzdy soǵystar» fılmindegi búkil ǵalamshardy qıratýǵa jetkilikti kúshi bar qarýlanǵan ǵaryshtyq stansıanyń ataýy. Maqala avtory EXPO-Astana-nyń bas nysanyn fılmdegi ǵarysh stansıasyna uqsatqan.
Avtor maqalasynda Ortalyq Azıanyń astanasy álemge áıgilep jarqyratyp kórme salǵanyn, alaıda «oǵan qonaq shaqyrýdy» umytyp ketkenin, postsovettik elde kórmeniń ashylýynda da yǵy-jyǵy adam bolmaǵanyn aıtady. Sondaı-aq ol, EXPO-nyń dúbiri estilgende Qazaqstannyń 5 mıllıon qonaq keledi dep kútkenin, birte-birte «armanynyń» 2 mıllıon, 1 mıllıonǵa deıin azaıǵan, aqyr sońynda ashylý saltanatynda 10 myńdaı ǵana adam bolǵanyn jaza kele, 2010 jyly Shanhaı kórmesinde 73 mıllıon adam bolǵanyn eske alady.
Maqala avtory ary qaraı Qazaqstannyń ishki-syrtqy saıasatyn saralaı kele, tipti EXPO-nyń Almatyda ótpegenine de «qynjylys» bildiredi.
FP jýrnaly osy maqalany basqan soń Qazaqstanda ashylmaı qaldy ma ol jaǵy belgisiz. Qamshy tilshisi qazaqstandyq provaıderlerge qońyraý shalyp kórdi. Alaıda mardymdy jaýap ala almady.
Tanymal jýrnal basqan maqala EXPO ótkizgen eldiń shymbaıyna batty ma? Ol jaǵy da belgisiz. Bir anyǵy EXPO bastalǵaly basynan daý arylmaı keledi. Qazaqstandaǵy eń jeksuryn qylmys jemqorlyqpen shatylyp birinshi basshysy qapasqa qamaldy. Ótken jyly qarashada EKSPO-nyń birneshe pavılony qulady. Sol kezde tipti EXPO salýǵa aqsha joq dep Esimov kásipkerlerden aqsha da jınady. Sońǵy bir jyl boıy aýyl muǵalimderine EKSPO bıletterin kúshtep alǵyzyp jatqany aqparat shyǵyp kelgende eleń etpegen edik, tipti sol bıletter jasandylary bar bop shyqty.
Bizdiń qaıǵymyz AQSH-tyń alpaýyt jýrnalynyń Qazaqstanda ashylmaı qalǵany emes, sol jýrnalda jaqsy jaǵynan kórine almaǵanymyz; Sol jýrnaldy oqyǵan myńdaǵan oqyrmannyń Qazaqstan týraly qalyptasatyn pikiri... Osy sátterde amalsyz, yryqsyz Astana bettep bara jatqan aýyl muǵalimderiniń kúıi...
Nurǵalı NURTAI
