Almatynyń búgingi aýa raıyna qarap, jeltoqsan bastalyp ketti me dep qalasyz. Aıtaıyn degenim basqa edi... Tańerteń avıakassalardyń birine soqtym. Kezekte eshkim bolmaǵandyqtan bıletimdi alyp, syrtqa tez shyqtym. Jalańbas júrgendikten tańǵy sýyqtyń “kaıfyn” ustaǵym kelmeı, aıaǵymdy jyldamyraq bastym. Shapshań júrisimdi qaıteıin, qyrsyq qylǵanda mashına esigi ashylmaı qaldy. Púltti olaı bir basamyn, bulaı bir basamyn. Avtokólik bylq etetin emes. qansha myqshyńdasam da qazaqsha baıandama tyńdaǵan Asqar Mamın sıaqty bedireıgen kúıinen aınyǵan da joq. Qaıtadan olaı bir basam, bulaı bir basam. Eski mashınam eleń qylatyn emes. Ábigeri shyqqan Serik Ahmetovti syrtynan baqylaǵan Nurlan Nyǵmatýlın sıaqty áli bezerip tur. Qyrsyq qylǵanda, baǵdarsham tejegen avtobýstyń dál qasyma toqtaǵanyn qaıtersiń... Mańdaıymnan ter burq ete qaldy. Álgi avtobýs ishindegi jolaýshylar dármensiz qalpymdy rahattana baqylap turǵandaı áser aldym. Múmkin, eshkim qaramaǵan da shyǵar? Ábigerlengende bári “qos kórinedi” emes pe? Púltti qaıta qaıta basyp jatyrmyn. Ara arasynda mashınaǵa eshqandaı qatysy bolmasa da kýrstastarymdy, klastastarymdy sybap qoıamyn. Aıdaladaǵy Úkimettiń adresine de biraz balaǵat ketti. Púltti taǵy da basamyn. Jumys istep turǵanynyn anyq bilsem de batereıasyn qaıta qaıta tekserip qoıamyn. Mashına bylq etpeıdi. Endi memlekettik tilde jaman sózderdi tógip jatyrmyn. Bir kisiniń eki tildi qatar qoldaný týraly eskertpesi esimi túsip, arasynda resmı tilde de sybap qoıamyn. Reaksıa joq. Endi ne isteımin? Tańǵy sýyqta basymdy tońdyryp turam ba, osylaı? Odan da mashınany osynda tastap, taksıletip úıge baraıyn dep sheshtim. Ary qaraı ketip bara jatsam, o toba, “balaǵattanýǵa armansyz shomylǵan” mashınam basqa jerde tur. Sóıtsem, baǵanaly beri (menikinen aýmaıtyn) basqa mashınaǵa “tıisip” turyppyn. Qanym basyma shaýyp júrip, onyń nómirine de qaramaǵanmyn ǵoı. Sóıtsem, bárine ózim kináli ekenmin. Mashınamnyń púlti birese istep, birese istemeı turǵandyqtan, esigin sıgnalızasıaǵa qoımaı, kiltpen jaýyp ketken edim. Daýysynan aırylǵan "Honda" baıǵus alysta turyp, qalaı belgi bersin? Basqa mashınaǵa “qyryndaǵanymdy” kórip, ishteı qyzǵanǵan da shyǵar? Obaly ne kerek, eshteńe bildirgen joq...