"Biz kez-kelgen syndy sabyrly qabyldaıtynymyz bárińizge málim. EKSPO týraly maqtaý sózder de, syn da aıtylyp jatyr", —dedi QR Aqparat jáne komýnıkasıalar mınıstri Dáýren Abaev Foreign Policy amerıkalyq basylymynda jaryq kórgen Djeıms Palmerdiń EKSPO kórmesi týraly synı materıalyna, sondaı-aq saıttyń Qazaqstanda buǵattalýyna qatysty pikir bildire otyryp.

Aıta keteıik, jahandyq saıasat, ekonomıka, ıntegrasıa taqyryptaryn jazatyn, eki aıda bir basylyp shyǵatyn tanymal jýrnalda 15 maýsymda Qazaqstan týraly maqala shyqqan. Maqalada EXPO-nyń bas nysany «Nurly álem» ulttyq pavılony «Ólim Juldyzyna» teńelip, mysqylǵa alynǵan. EKSPO-ǵa Qazaqstan 5 mıllıon qonaq keledi dep kútkenin, alaıda qonaqtarynyń sany 10 myńǵa árei jetkenin jaza kelip, tipti EKSPO-nyń Almatyda ótpegenine de  «qynjylys» bildirdi. Maqala avtory – brıtandyq jýrnalıs Djeıms Palmer.

Budan keıin "Astana EKSPO-2017" UQ qoǵammen baılanys departamentiniń dırektory Sergeı Kýıanov Djeıms Palmer esimdi tilshiniń bar ekenin, Foreign Policy amerıkalyq basylymynda shyn máninde maqala jazǵanyn, biraq EKSPO kórmesine mundaı jýrnalısiń tirkelmegenin aıtqan. Keıin Palmer tólqujatyndaǵy Qazaqstanǵa kelgenin dáleldeıtin mórdi sýretke túsirip, Twitter paraqshasynda jarıalady.

"EKSPO baspasóz hatshysy Kýıanovtyń málimdemesi týraly aıtar bolsaq, Sergeıdi adamgershilik turǵydan túsinýge bolady. Óıtkeni jýrnalıs Palmerdiń málimdemesi shyndyqqa sáıkes kelmeıtinin jaqsy bilesizder", — dedi mınıstr.

"On kúnniń qorytyndysy boıynsha alǵashqy nátıjeler kórme boıynsha jasalǵan sátti boljamnyń oryndala bastaǵanyn kórsetip otyr. Foreign Policy jýrnalısi shyndyqty aıtpaı, faktilerdi ótirik aıta bastaǵanda, bul árıne kórmeni uıymdastyrýǵa tikeleı aralasyp júrgen adamnyń kóńiline tıedi. Sondyqtan múmkin osyndaı emosıonaldy reaksıa bolǵan shyǵar",- dedi ol. 

Sondaı-aq, Abaev qazaqstandyqtardyń Foreign Policy basylymynyń saıtyna kire almaýyna qatysty da pikir bildirdi. 

"Foreign Policy saıtynyń buǵattalýyna qatysty máselege kelsek, qazir bárin anyqtap jatyrmyz. Bireýdiń jaǵdaıdy ýshyqtyrý úshin muny ádeıi isteý múmkin ekendigin joqqa shyǵarmaımyz. Bizdiń tarapymyzdan saıtty buǵattaý boıynsha eshqandaı áreket bolǵan joq",- dep túıdi sózin Abaev.