Kóresini kórshiniń kınosynan kórdik. Kórmeıtindi de... Qazaqty tilimen bezegender endigi kezekte kınosyn kezep tur. Boratpen bastalǵan búliktiń namysymyzdy súlikteı sorǵany azdaı arnamyzǵa taǵy bir jańalyq kelip tústi. Ot ala kelgen orystar. Taban asty tańǵajaıyp týdyrýdan jalyqpaıtyn Reseılikter jaqynda bas balýandary Ivan Poddýbnyı jaıly fılmdi jaryqqa shyǵardy. Balýannyń baǵasyn boıamasyz berýge tyrysqandyqtary sonshalyq tipti asyra siltep jiberipti. Tirisinde ózinen asyra silteı almaǵan balýanyn jerde jatqanda jyqqan rejıserge ne joryq. Orys balýanynyń tulǵalyq bolmysyn ashýda «ashýǵa» býlyqqan Gleb Orlov Qajymuqan róline qajyǵan bireýdi oınatyp muqym elge masqarasyn shyǵarady. Tipti túrik balýany dep tanystyryp,kúresten úlesi joq keıipte kórsetedi. Túr túsi qazaqqa qosylmaıtyn akterǵa alybymyzdyń rólin berip, abyroıǵa qaryq qyldy. Ol kınony kórgen kúresten habary az adamdar Qajymuqan jaıly solar salǵan kózqarasta qalýy ábden múmkin. Arenada Poddýbnyıdyń Qajymuqandy aınaldyra alyp jyqqanda aqyl esinen ajyrap qalatyn sáti naǵyz otqa maı quıǵan epızod boldy.
Tarıhqa kóz júgirtetin bolsaq jaǵymsyz jańalyqtyń jalǵandyǵyna kóz jetkizemiz. Ivan men Qajymuqan arasyndaǵy shynaıy serilerge tán syılastyqtyń bolǵandyǵyna kýá bolamyz. Tipti,orys aǵaıyndar Qajymuqandy «Qara Ivan» dep ataǵan. Bolǵan beldesýlerdiń ózinde bas balýandar bir-birine boı bermegen. Óz ómirinde ózinen ózgeniń ústemdigin kórmegen balýanǵa Gleb Orlovtyń at ústinen qararlyq jóni joq edi ǵoı?! Tarıhı oqıǵalarǵa baılanysty kınolarǵa aıdan anyq nárselerdi tumshalap búrkeýdiń ne qajeti bar? Salmaqty tarıhı taqyrypqa jeńil kózqaraspen qaraıtyn ne qylǵan rejıser? Shet eldik rejısermen birigip túsirse bir sirá...
Aıtpaqshy sol fılmnen ózimizdiń qazaq ártisin de kórip qaldyq. «Balalyq shaǵymnyń aspany» t.b tańdaýly kınolarǵa túsken Dáýlet Ábdiǵapparovty. Ol túrik balýany Kara Ahmet pashanyń rólin somdaıdy. Sol fılmge túsken balýan deneli Dáýlettiń de balýanymyzdan habary bolmaǵandyǵy ma,degen oı ketedi... Ý dy ý qaıtarady. Qazaqfılm Qajymuqan jaıly fılm túsirý jumystaryna kirisip, akterlerge kastıng jarıalaǵanyn habarlaıdy Almaty telearnasy. Tek aıaǵy «Boratqa jaýap» jumysyn jaýapsyz qaldyrǵan Raqyshev rejıserdaı bolmasa.
Orhan Baqytbekov.
