Shymkentte iri qazaq-qyrǵyz bazary ashylady dep habarlaıdy otyrar.kz. Burynǵy Bekjan bazany endi Shymkent-Dordoı bazary dep atalmaq. Bul jaıynda Bekjan bazarynda ótken jıynda aıtyldy. Saýda ornynyń quryltaıshysy Ámirhan Shúmenov bazardy kórshi Qyrǵyzstandaǵy Dordoı bazarynyń basshysyna 10 jylǵa basqarýǵa beripti. Al aıyr qalpaqty aǵaıyn óz kezeginde bazarǵa 3 mıllıon dollar ınvestısıa quıýǵa ýáde berip otyr.
Burynǵy Bekjan bazary endi Shymkenttegi eń iri, saýdagerlerge yńǵaıly jáne arzan bazar bolady. Bul týraly osy bazardy 10 jylǵa basqarýǵa alǵan qyrǵyzstandyq Dordoı bazarynyń quryltaıshylary málimdedi. Qyrǵyz kásipkerler Shymkenttegi saýda ornyna 3 mln dollar ınvestısıa quıamyz dep otyr. Al bazar mańyndaǵy 4 gektar jerde 5 myń avtokólike arnalǵan avtoturaq salynbaq.
Esterińizge salar bolsaq, osydan birneshe jyl buryn bul bazardyń órtengenin kópshilik áli umytqan joq. Osy oqıǵadan keıin bazar basshysy Ámirhan Shýmenov saýda ornyn zaman talabyna saı etip, saýdagerlerge yńǵaıly etip saldy. Búginde bazarda 8 myń saýdagerge arnalǵan dúńgirshek bar. Jáne qaladaǵy eń qaýipsiz bazar boldy. Al 50 myń satýshysy bar Dordoı bazary da eki ret órtendi degen qyrǵyz aǵaıyndar Bekjan bazarynyń qurylysyna tańdanyp, tańdaı qaqty. Jáne Jibek jolyndaǵy eń úlken saýda ornyna aınalatynyna senimdi ekenderin ashyq aıtty.
Jańa bazarda endi úsh basshy bolady. Onyń ekeýi qyrǵyzdardyń ókilderi, al dırektorlyq qyzmet buǵan deıin birneshe bazardy aıaǵynan turǵyzǵan Klara Nádirqulovaǵa senip tapsyrylypty. Al ol óz kezeginde barlyq satýshylarǵa jaǵdaı jasap, saýdagerlerdiń saýdasy júrgenshe salyq almaıtynyn aıtty. Taǵy bir aıta ketetin másele, búgingi tańda Shymkent qalasyndaǵy ózge bazarlarda 5 myńnan astam qyrǵyz aǵaıyn saýda jasap júr.
