Bul kúnde jarnama beti juldyzdar jınalar meken bolǵan. Tyńdarmandaryn tań qaldyrý úshin «tańǵajaıyp» óner adamdary qaı joldyń bolsyn basyn shalyp kóredi. Selk etkizer selfıi bolsyn, jeke basyna qatysty dúnıeleri bolsyn, dúrkin-dúrkin jarıalap, jalpymaqtaý alyp jatqany. Jalt etip jarnamadan da kórinip qalady. Halyq arasynda qalyp bara jatqan abyroıyn bir silkindirip alý da maqsat bolsa kerek. Áleýmettik jelide ánshilerdiń tek ájethanda túsken sýreti joq qalǵanyna qaıyrymdylyq jasaǵan. Bul da jarnama. Hosh, jankúıerleriniń jan qıyla suranysy boıynsha shyǵar. Qazir «sensasıa» jasaýdyń jalqaý túrleri qaptap ketti. Pıar arqyly berekesi kete bastaǵan abyroıyńyzdyń bárin bolmasa da biraz bóligin qaıtaryp alýǵa múmkindigińiz bar. Bul úrdisti ánshiler qaýymy qajetine jaratyp-aq keledi. Teledıdar jarnamasynyń tuqaqty kórermenine aınalǵan bizder úshin jylt etken beıne-rolıkten kóringen óner adamy kóńilimizdegi beınesin kemeldendire túsedi. Qala kóshelerindegi bılbordtarda da solaı, Ilá Ilın, Roza Rymbaeva, Baıan Esentaevalar túsken jarnamalar qala kóshelerin kóriktendirip tur. Bul tanymaldylyq ónimniń de, óziniń de abyroıyna «jumys isteıdi». Aıtar aýyzdyń aldynda júredi. Jalpy halyq teris kórmeıdi. Al endi bizdi oılandyryp, ishki qarsylyǵymyzdy týdyrǵany myna jarnama bolatyn.
Bul qalamyzdaǵy jeńildikten kóz ashpaıtyn KIMEX GRAZIE brendtik dúkeniniń jarnamasy. Sýrette Nurlan Abdýllın myrza. Bul kisiniń de bir kisilik abyroıy, ánshiligi bar adam. Biraq myna jarnamanyń qanshalyqty materıaldyq paıda túsirgenin bilmesem de moraldik turǵydan mysqaldaı abyroı ákelgenine shúbám bar. Halyq óner adamynyń aýzynda dýasy bar deýshi edi, mynadan keıin dýamyzdyń ıesin tappaı júrgen shyǵar. Erdiń jasy elýge kelgen aǵamyzdyń aýzy týflıdiń ókshesi turatyn jer bolǵany ma? Sahna sýyt qaraǵaly sol deńgeıge tústi me? Aıtpaqshy bul jarnama plagıat bolyp shyqty. Jarnamanyń túpki ıesi MAX Shoes shvesarıalyq brendi eken. Kóptegen festıválderdiń júldesin jeńip alǵan kórinedi. Bunyń arty qyrǵyzdan alǵan «qyzyl órikteı» aǵaıyngershilikpen sheshilse quba-qup..!
Orynbasar Baqytbek
