«Oskar» syılyǵynyń ıegeri, Gollıvýdtyń tanymal aktery Nıkolas Keıdjdiń búgingi jumys kestesi de tym tyǵyz boldy. Akter aldymen Astana ákimi Áset Isekeshevpen birge tal ekti. Osydan keıin «Bes qurlyq» atty balalar fılmderiniń festıvaline qatysty, dep xabarlaıdy Qamshy.kz aqparat agenttigi QazAqparatqa silteme jasap.

Festıváldiń ashylýyna oraı qyzyl kilem tóseldi. Onda da Nıkolas Keıdj kilemmen júrmeı, óziniń jankúıerlerine asyqty. Qolyn berip, bárimen fotoǵa túsip shyǵýǵa tyrysty. Tipti, qyzyl kilemdi eki ret aınalyp shyqty. Al festıváldiń ashylý saltanynda «Sálemetsiz be!» dep, jınalǵan jurtpen qazaq tilinde amandasty. Keıdj jas akterlarǵa da óz keńesin berdi. «Kıno sizdiń qıalyńyz ben qoǵam arasyndaǵy aına ispetti. Siz beıtarap pozısıany ustaýyńyz qajet. Aýdıtorıanyń ózi qıalyn sharyqtatyp, bıik armandarǵa umtylýy tıis. Al qıaldy damytý úshin mıfologıa, shejireler, ertegiler jáne taǵy basqa ádebı shyǵarmalardy jıi oqý kerek», - deıdi Nıkolaı Keıdj.

Festıválden keıin akter Qazaq ulttyq óner ýnıversıtetine bardy. Sol jerde ol qazaqtyń «Adaı" kúıi» men «Kózimniń qarasyn» tyńdap, qıaldy damytýǵa qatysty áńgimesin jalǵastyrdy. Akterlik jolǵa túsý ońaıǵa soqpaǵanyn da ashyq aıtty. «Shynymdy aıtsam, basynda kastıngter kezinde maǵan ylǵı «Joq!» dep jaýap beretin. Joq, joq, joq... Óz-ózime degen senim joǵala bastady. Bir rette qatty alańdap ketkenim sonsha, jańaǵy «joqtardyń» kesirinen aýrýxanaǵa da tústim. Sodan keıin taǵy bir kastıngke barýǵa bel býdym. Ótip kettim! Negizi, menen jaqsy jazýshy da shyǵatyn edi», - deıdi Keıdj.

Ýnıversıtette bolǵan jıynnan keıin mártebeli meımanǵa dastarxan jaıyldy. Sol jerde ýnıversıtet rektory Aıman Musaqojaeva Gollıvýd juldyzyna qazaqtyń dástúri boıynsha shapan japty. «Nıkolasqa qazaqtyń shapany óte unady. Túsi de, materıaly da jaqsy dedi. Tipti, onymen fılmge de túsýge bolatynyn jetkizdi», - dedi Aıman Qojabekqyzy suxbatynda.