22 shilde kúni Oral qalalyq mádenıet jáne demalys saıabaǵynda qaıǵyly oqıǵa boldy, dep habarlaıdy Qamshy.kz aqparat agenttigi QazAqparatqa silteme jasap.

BQO TJ departamenti jedel qutqarý qyzmetiniń bas qutqarýshy-psıhology Leıla Ábdirahmanovanyń aıtýynsha, osyndaǵy aqyly jaǵajaıda («Evrostandart» JSHS) saǵat 15.00-der shamasynda 2000 jylǵy bozbala Shaǵan ózenine batyp ketken. Osyndaǵy jaldamaly qutqarýshylar sýdan alyp shyqqanymen, bári kesh bolǵan. Marqum ákesiniń kóz aldynda sýǵa ketip qalǵan.

Oqıǵaǵa qatysy bar adamdardyń sózine qaraǵanda, Tórehan Bókeı ordasy aýdany Bısen aýyldyq okrýginen Oralǵa oqýǵa túsemin dep kelgen. Ol mektepte sabaǵyn jaqsy oqyǵan. Ókinishke qaraı, júzý bilmeıdi eken.

Eske sala keteıik, budan buryn 6 shilde kúni Jánibek aýdanynan oqýǵa kelgen 1999 jylǵy qyz týysqandarymen «Svetláchok» týrbazasyna demalamyn dep baryp, Derkól ózenine batyp ketken bolatyn. Ol da júzý bilmegen.

2015 jyly óńirde 29 adam (sonyń 13-i - balalar) sýǵa ketse, ótken jyly 20 adam (9-y - balalar) «tilsiz jaýdyń» qurbany bolǵan edi. Bıyl osymen úshinshi adam sýǵa ketip otyr. Oǵan qosa buǵan deıin 12 adam qutqarylsa, onyń beseýi - balalar.