Halyqaralyq «EKSPO-2017» kórmesin ótkizý aıasynda qalalyq avtovokzalda anyqtamalyq - aqparattyq resepshn ashyldy, dep habarlaıdy Qamshy.kz aqparat agenttigi Astana ákimdiginiń medıa ortalyǵyna silteme jasap.
«Saparjaı-Astana» JSHS dırektorynyń orynbasary Jarqyn Bekjanovtyń aıtýynsha, jaz bastalǵaly jolaýshylar aqparatty úsh tilde - qazaq, orys jáne aǵylshyn tilderinde alýda. Ózgeris tek jolaýshylar qyzmetinde ǵana oryn alǵan joq. Bıyl avtovokzal qaıta jóndeýden ótkizilýde. Kútý zalynda eden jabyndysy aýystyrylyp, syrtqy kelbeti jartylaı ózgertildi. Jumys tolyǵymen ekinshi jarty jyldyqta aıaqtalady. Qazirgi tańda káriz júıesin jóndeý jumystary aıaqtalýda. Barlyq qurylys jumystary jolaýshylar kesheniniń jumysyna esh kedergi keltirgen joq.
- Qazir jolaýshylardyń jaılylyǵy úshin avtovokzal aýmaǵynda ana men bala bólmesi, asqana, dúńgirshekter múmkindigi shekteýli jandarǵa arnalǵan dárethana bar, - dep habarlady J. Bekjanov.
Eske salatyn bolsaq, «EXPO — 2017 Astana» ulttyq kórmesi aıasynda Astanada aǵylshyn tilin biletin taksı qyzmeti de qolǵa alynǵan bolatyn. Sondaı-aq, polısıa qyzmetkerleri, tasymal men habar almasý salasynda da aǵylshyn tilin biletin mamandar qyzmeti qosylǵan bolatyn. Sondaı-aq Qazaqstannyń túkpir-túkpirinen volonter jastar tartylǵan edi.
Aıta ketsek, «EXPO — 2017 Astana» ulttyq kórmesi aıasynda Astanada jańa avtobeket qana emes, «Nurly jol» dep talatyn jańa temir jol vokzaly jáne «Nursultan Nazarbaev» atyndaǵy jańa halyqaralyq áýejaı termınaly óz jumysyn bastaǵan edi. Olardyń bárinde EXPO qonaqtaryna arnalyp, qajetti jaǵdaılar tolyqtaı jasalǵan. Qonaqtar qalaýynsha tasymaldyń túrlerin tańdaı alady.
