BQO-nyń Aqsaı qalasynda ákimdik Keńes odaǵynan beri esimi ózgertilmeı kele jatqan kóshelerge qatysty turǵyndardyń basyn qosyp,  jınalys ótkizdi. Talqylanǵan másele – Iýbıleınaıa jáne Elevatornaıa kósheleriniń atyn aýystyryp, qazaq batyrlarynyń esimin berý. Alaıda jergilikti turǵyndardyń basym kópshiligi (orys ultynyń adamdary) kósheniń ataýyn ózgertýge úzildi-kesildi qarsy shyǵyp, bıliktiń usynysyn qabyl almaı tastady, dep habarlaıdy Qamshy.kz aqparat agenttigi Moı gorod saıtyna silteme jasap.

Aýdandyq jáne qalalyq ákimshilik qyzmetkerleri jasaǵan jınalysqa eki kósheden bar-joǵy 30 ǵana turǵyn kelip qatysqan. Olardyń deni – Iýbıleınaıa kóshesiniń turǵyndary. «Atalmysh kóshede qanshama halyq turyp jatyr?» degen suraqqa olar jaýap bere almady.

Býrlın aýdanynyń ákimdik apparatynyń basshysy Darhan Aqedilov maratorıı óz kúshin joıǵandyqtan, kóptegen aýyl-aımaqtardaǵy kóshelerdiń esimin aýystyrý isi qolǵa alynǵandyǵyn aıtyp, aty esh mán-maǵyna bermeıtin kósheler ózge ataýǵa ıe bolatyndyǵyn jetkizgen.

«Iýbıleınaıa kóshesi naqty qandaı merekeniń nemese naqty kimniń qurmetine berilgendigin eshkim de bilmeıdi. Býrlınsk aýdanynyń qurmetti turǵyndarynyń birinen kóshe esimin 18 ǵasyrda ómir súrgen batyr Jolbarystyń atyna aýystyrýǵa usynys kelip tústi», - dep málimdedi Aqedilov.

Alaıda, ákimniń bul sózine ashýlanǵan turǵyndar bul usynysqa qarsy shyǵyp, kóshe ataýyn ózgertýge ruqsat bermeımiz dedi.

«Bir adam usyndy eken dep kósheniń ataýyn ózgerte salýymyz kerek pe? Sizder eń aldymen kóshege durystap jóndeý jumystaryn júrgizińizder, bul kóshede aıaq alyp júrý múmkin emes. Al jańaǵy usynys bildirgen «qurmetti azamat» degenińiz kim? Aty-jónin aıtyńyz», - dep zalda otyrǵandardyń biri óz shaǵymyn aıtyp qaldy.

Belgili bolǵandaı, kóshe ataýyn aýystyrýǵa Joldyǵalı Batyrhanov esimdi turǵyn usynys bildirgen eken. Ózi – Jolbarys batyrdyń urpaǵy. Densaýlyǵyna qatysty jınalysqa kele almaǵan, alaıda onyń oı-pikirin balalary men nemereleri jetkizipti.

Jınalys barysynda eki taraptyń da pikiri tyńdalyp, daýysqa salǵan. Alaıda kóshe esimin ózgertýge usynys bildirgen kisiniń týystary ǵana kelisim bergen, al qalǵan turǵyndar úzildi-kesildi qarsy shyǵypty. Bir qýantarlyǵy - №5 mekteptiń janynan Jolbarys batyrǵa arnap eskertkish ornatýǵa sheshim qabyldanǵan. Turǵyndar buǵan ruqsat beripti.

Esterińizge sala ketsek, Aqsaı qalasynda kóshe ataýlaryna qatysty narazylyqtar 2014 jyldyń kúzinde bastalǵan. Ol kezde 50 kósheniń atyn ózgertý kózdelgen. Alaıda, jergilikti turǵyndardyń aryz-shaǵymdary men túrli narazylyq hattary bul isti keıinge shegergen bolatyn. Sonymen qatar Qazaqstandaǵy moratorıı 2016 jylǵa deıin sozylǵan.

Keıinnen kóshe esimin ózgertý máselesi 2016 jyly taǵy da kóterilgen. Ol kezde Býrlınsk aýdanynda birneshe kishigirim kóshelerdiń ataýy ózgertilgen. 2016 jyly bul máselege qatysty jergilikti turǵyndardyń tym az bóligi ǵana jınalysqa qatysqanymen, solardyń qalaýyna baılanysty kóshe ataýlary ózgertilgen edi. Alaıda, qazirgi kezde ol kóshelerdi jańa ataýymen eshkim de atamaıdy eken. Barlyǵy eski ataýyna úırenip qalǵan.

 Daıyndaǵan: Nazerke Labıhan