«Serpin» áleýmettik jobasy boıynsha joǵary oqý oryndaryna qujat qabyldaý naýqany bastaldy, dep habarlaıdy Qamshy.kz aqparat agenttigi.
Bul joba 2014 jyldan beri júzege asyp keledi. Maqsaty – ońtústik óńirdegi jastardyń Batys pen Soltústik Qazaqstanda bilim alýyna jaǵdaı jasaý. Sol arqyly jas qyz-jigitterdi ındýstrıaǵa tartyp, elimizdiń ózge óńirlerin órkendetýge jumyldyrý. Memleket atalǵan jobany júzege asyrý maqsatynda aǵymdaǵy jyly 3793 grant bóldi. Onyń teń jartysy tehnıkalyq mamandyqtarǵa baǵyttalsa, qalǵany pedagogıka men aýyl sharýashylyǵy salasyna arnalǵan. Qujattar elimizdiń batysy men soltústiginde jáne shyǵysynda ornalasqan 24 joǵary oqý ornynda qabyldanyp jatyr. Ótken jyly atalǵan joba boıynsha Almaty oblysynan myńnan astam qujat qabyldanyp, úmitkerlerdiń basym bóligi oqýǵa tústi. Olar qazir elimizdiń batysy men soltústigindegi kolejder men joǵary oqý oryndarynda bilim alyp jatyr.
