Ult josparynda esep beretin memleketti qalyptastyrý besinshi ınstıtýsıonaldyq reforma retinde belgilengen bolatyn. QR Aqparat jáne komýnıkasıalar mınıstri Dáýren Abaevtyń aıtýynsha, «100 naqty qadamda» atalǵan reformany iske asyrýdy kózdeıtin birqatar sharalar tolyǵymen atqaryldy, dep habarlaıdy Qamshy.kz aqparat agenttigi QazAqparatqa silteme jasap.

«Atap aıtqanda, 94-qadam boıynsha «Aqparatqa qol jetkizý týraly» zań qabyldandy. Osy jumysqa úkimettik emes uıymdar belsene atsalysty. Zańda shyn máninde kóptegen oń bastamalar kórinis tapty. Osynyń barlyǵy árbir azamatqa memlekettik organdar qyzmeti týraly aqparatty erkin alý men taratýǵa múmkindik beredi. Zańnyń taǵy bir tıimdi tusy, aqparatqa qol jetkizýge shekteý qoıý sharalaryna tyıym salyndy. Atalǵan normany buzǵany úshin laýazymdy tulǵany jaýapkershilikke tartý máselesi de qarastyryldy», - dep atap kórsetti mınıstr Abaev búgin Úkimette ótken baspasóz máslıhatynda. Onyń aıtýynsha, aqparatqa qol jetkizý boıynsha arnaıy komısıa qurylyp, osy máseleni jiti baqylap keledi.

Halyq esep beretin memleketti qurý jolyndaǵy taǵy bir shara - «Ashyq úkimet» júıesin tolyǵymen iske qosý. Atalǵan mindet 96-qadamǵa jatady. Búginde open.egov.kz - «Ashyq úkimet» portalynda «Ashyq málimetter», «Ashyq normatıvtik-quqyqtyq aktiler», «Ashyq búdjetter», «Ashyq dıalog» jáne memlekettik organdardyń tıimdiligin baǵalaıtyn bólim ashyldy. Máselen, «Ashyq normatıvtik-quqyqtyq aktiler» bólimine kirgen kez kelgen adam zań jobalarynyń talqysyna qatysa alady. «Ashyq búdjetter» arqyly búdjet shyǵyndaryn baqylaýǵa múmkindik bar. Al «Ashyq dıalogta» memlekettik organ qyzmetkerlerine tikeleı saýal joldaýǵa bolady. «Negizi, «Ashyq úkimet» - demokratıalyq qoǵamdy qurýdyń birden bir joly. Mysaly, endi barlyq memlekettik organdar óz búdjetterin ashyq túrde jarıalaýǵa mindet. Demek, árbir adam búdjet shyǵyndaryn baqylaı alady. Sol sıaqty «Ashyq dıalogta» kez kelgen sheneýnik portalǵa túsken suraqqa jaýap joldaýy tıis. Memlekettik organ kez kelgen zań jobasyn qabyldaýdyń aldynda ony halyqtyń talqysyna salýy qajet», - dep atap kórsetti Dáýren Áskerbekuly.

Al memlekettik qyzmetterdi elektrondy úlgige aýystyrý arqyly halyqtyń ýaqytyn únemdep qana qoımaı, jemqorlyq áreketterin de barynsha azaıtýǵa bolady. Sol sebepti 100-qadamda memlekettik qyzmetterdi avtomattandyrý mindeti qoıyldy. Osyǵan oraı, ótken jyly «Azamattarǵa arnalǵan úkimet» memlekettik korporasıasy quryldy. Búginde korporasıa arqyly barlyq 723 memlekettik qyzmettiń 548-in nemese 76 paıyzyn alýǵa bolady. Aǵymdaǵy jylda atalǵan kórsetkishti 85 paıyzǵa deıin arttyrý josparlanǵan. Jalpy, qazirgi kezde «Azamattarǵa arnalǵan úkimet» memlekettik korporasıasyna qarasty 350 halyqa qyzmet kórsetý ortalyǵy bar. Jyl saıyn atalǵan ortalyqtar san alýan anyqtamalardy mıllıondap beredi. Osylaısha, aqparat jáne komýnıkasıalar mınıstrligi bes ınstıtýsıonaldyq reformany iske asyrýdyń úsh qadamyn oryndap otyr.

Aıta keteıik, esep beretin memleketti qalyptastyrý mindeti 91-100  qadamdardy qamtıdy. Oǵan basqa memlekettik organdar da jaýapty.