Qyrǵyz eliniń prezıdenti Almazbek Atambaev 24 shilde kúni Sholpan-Atada bolǵan baspasóz máslıhatynda «Sapat» (Sebat) mektebiniń muǵalimderine qatysty máselege toqtala ketti, dep habarlaıdy Qamshy.kz aqparat agenttigi Opennewsportal.com saıtyna silteme jasap.
«Ózderińiz bilesizder, men «Sebat» mektepterin jabýǵa tyıym salǵandyqtan, Túrkıa bıligi bizge degen renishin bildirgen bolatyn. Alaıda, «Sebat» mektepteri – óte keremet mektepter dep senimmen aıta alamyn. Olardyń talaptarynan keıin biz ol mektepterdi qatań baqylaýǵa aldyq. «Sebat» mektepteriniń 35%-y qazir Qyrǵyz Respýblıkasynyń Bilim jáne ǵylym mınıstrliginiń qaramaǵyna ótken. Biz ashyq túrde ol mektepterdi bizge berýin ótingenbiz. Sonymen qatar, «Sebat» ataýyn biz «Sapat» dep aýystyrdyq. Bul mektepte jumys isteıtin muǵalimderdiń 90-95%-y qyrǵyzdar», - dep málimdedi ol.
«Túrkıa elshisiniń aıtýynsha, Qyrǵyzstanda jumys isteıtin adamdardyń 3,5 mıllıony Gúlenniń jaqtastary eken. Olardyń kópshiligi «Sapat» mektebiniń muǵalimderi. Al, eger, mektep muǵalimderin terrorıst dep tanıtyndar bolsa, ózderiniń aqyl-esteriniń durystyǵyna kóz jetkizý úshin olar dárigerge baryp kóringenderi durys... Ol mektepterdiń jabylyp qalýyna jol bermeıtindigimizdi ashyq túrde jarıa etkim keledi. Bizdiń búdjetimizdiń 24%-y bilim salasyna jumsalyp otyr, sondyqtan da biz bul máseleni kúsheıtemiz jáne tek alǵa qaraı júremiz», - dep óz oıyn kesip aıtty Atambaev.
Sonymen qatar, baspasóz máslıhatyna qatysýshylar Qyrǵyz eliniń eks-múftıi Chýbak qajy Jalılov AQSH-qa barǵan kezinde sol jerde turatyn túriktiń din ókili Fethýllah Gúlenmen kezdeskeni jaıynda da Almazbek Atambavetan túsinik berýin surady.
«Jalılov qazir eshqandaı da laýazymda otyrǵan joq, sol sebepti de ol óziniń qalaǵan adamymen kezdese alady. Bireý Erdoǵanmen kezdessin, bireý Gúlenmen kezdessin, mańyzy joq, biz – erkindikti jaqtaıtyn memleketpiz. Eger, resmı ókilderdiń biri baryp kezdesse, sózsiz, qandaı da bir shara qoldanamyz. Alaıda, Jalılov ondaı resmı ókil emes, sondyqtan da ol qalaǵanyn isteı alady», - dep jaýap berdi Qyrǵyz Respýblıkasynyń prezıdenti.
Daıyndaǵan: Nazerke Labıhan
