Oral qalasynda bıyl 67 kósheniń 72 shaqyrym jolyn jóndeýge barlyq qarjy kózderi esebinen 8,1 mlrd. teńge bólindi, bul ótken jylǵydan úsh esege kóp, dep habarlaıdy Qamshy.kz aqparat agenttigi QazAqparatqa silteme jasap.

Oral qalasy jolaýshylar kóligi jáne avtomobıl joldary bóliminiń basshysy Qaırat Muhambetqalıevtiń sózine qaraǵanda, bıylǵy birinshi jartyjyldyqta tórt kóshedegi jol jóndeý jumysy aıaqtalsa, taǵy ekeýindegi jumystar bitkeli tur. 48 kóshede jóndeý jumystary atqarylýda. Al 13 kósheniń jolyna qatysty tenderlik rásimder júrgizilýde.

«QPO b.v.» kompanıasynyń qarjysyna (2,3 mlrd. astam teńge) depo kópiri qaıta salynyp jatqany belgili. Qurylysy eki jylǵa eseptelgen nysanda (bas merdigeri - «KA-Stroı LTD» JSHS) 59 uńǵymanyń 56-sy qazylyp, beton quıyldy. 130 tireý tolyqtaı ákelinip, qańqalardy ornatý jumysy bastaldy. Sol sekildi 712,1 mln. astam teńgege Jáńgir han kóshesi boıymen Ázirbaıjan kóshesinen Oral qalasy shekarasyna deıin uzyndyǵy 4550 metr (bas merdigeri «KAES Stroı Ko» JSHS) joldy ortasha jóndeý jumystary atqarylmaq. Qurmanǵazy kóshesi boıymen Á.Moldaǵulova kóshesinen E.Pýgachev kóshesine deıingi aralyqty (3845 metr, bas merdigeri - «AsarStroıServıs» JSHS) kúrdeli jóndeýge 889,3 mln. astam teńge qarastyrylǵan. Atalmysh kompanıa esebinen jóndeý jumystary barlyǵy 20 nysandy (kósheni) qamtıtyn bolady.

Osyndaı jol jóndeý jumystary búdjet esebinen de atqarylýda. Sonyń ishinde «Juldyz» shaǵynaýdanynda «Birlik» JSHS 498 mln.-ǵa jýyq teńgege 7 shaqyrymnan astam jol salýda. Kúrdeli jóndelip jatqan ózge de kósheler barshylyq. Sonymen qatar joldardy aǵymdaǵy jóndeýge 400 mln. teńge qaraldy. Buǵan 80 kóshede oıyqtardy jóndeý, jol tegisteý, jaıaýjoldardy salý jumystary jasalmaq.

Aıta keteıik, Oral qalasyndaǵy joldardyń jalpy uzyndyǵy 582,3 shaqyrym bolsa, sonyń 288,43 shaqyrymyna nemese 49,5 paıyzyna ǵana asfált tóselgen. Osy qatqyl tabandy joldyń teń jartysynan astamy syn kótermeıtindikten, qaıta jóndeýdi qajet etedi.