Qazaqstan Respýblıkasy Ulttyq ulanynyń Almaty qalasyndaǵy «Ońtústik» óńirlik qolbasshylyǵy áskerı bólimderiniń jas sarbazdary saltanatty túrde Áskerı ant qabyldady dep habarlaıdy Qamshy.kz aqparat agenttigi. Shara Almatydaǵy 28 panfılovshylar saıabaǵynda saǵat tańǵy 10.00-de bastaldy. Sharada barlyǵy 300-ge tarta jas jaýynger ant berdi.

Rásimdi ashqan 7552 áskerı bóliminiń komandıri podpolkovnık Serik Narymbekov  jıyn jóninde sóz sóıledi.

«Qurmetti sarbazdar, ant qabyldaý - Otanyńa, halqyńa aqtyq demiń shyqqansha adal bolý, el basyna syn saǵat tússe, onda moıymaı kóterý, qajet bolsa, jan qıý degen sóz. Sondyqtan da eldiń qorǵany ataǵyna saı, antqa berik bolyńyzdar. Talaı ǵasyr halqynyń erkindigin syrtqy jaýlardan qorǵaǵan Qabanbaı, Bógenbaı, Naýryzbaı syndy batyr babalarymyzdyń, abzal atalarymyzdyń amanattaǵan Otanymyzdyń táýelsizdigin qyraǵy kúzetińder», - dep aq tilegin arnady.

Jaýyngerlerdiń ant qabyldaý rásimine arnaıy kelgen ata-analar, ardagerler de izgi lebizderin bildirdi.

«Ońtústik» óńirlik qolbasshylyǵynyń ardagagerler keńesiniń tóraǵasy otstavkadaǵy polkovnık Gennadıı Faleev:

«Erlik ataýlynyń  qaınary – Otandy súıý. Elin, jerin súıgen azamattyń ımany da berik. Búgin Sizder ant qabyldadyńyzdar. Ol da Otanǵa degen súıispenshiliktiń belgisi. Sondyqtan da antqa, bergen ýádege berik, erjúrek bolyńdar, - dep  júrekjardy yqylasyn aıtty.   

«Kenje ulymnyń búgingi ant qabyldaý rásimine januıamyz  - zaıybym, qyzym jáne úlken ulym da keldik. Óıtkeni, ant berý rásimi áskerı ómirdegi mańyzdy qadam. Endi ár jas sarbaz Otan aldyndaǵy jaýapkershiligin túsineri sózsiz. Áskerı bólim basshylyǵynyń ár qaısymyzben júzdesip, kóńil bólýi, jalpy jaǵdaılaryn kórip, kóńilimiz kónshidi», - dep aǵynan jaryldy oraldyq Ǵazy Musaev.

Sondaı-aq, sonaý Ekibastuzdan kelgen Zaıda Ábdirahmanova: «Uldarymnyń barlyǵy áskerge bardy. Endigi kezek nemerelerimde. Tuńǵysh nemerem osynda boryshyn óteýde. Onyń búgingi ant berý rásimine arnaıy keldim. Álemdi qarasaq, nebir qantógis oqıǵalardy kórip otyrmyz. Elimiz Elbasynyń arqasynda osy tynyshtyǵynan jańylmasyn. Ulyma erjúrek bol deımin», - dep aq batasy arnady.      

Antty ústimizdegi jyldyń kókteminde Otan aldynda áskerı merzimdi boryshyn óteý úshin shaqyrylǵan sarbazdar qabyldady.

Ulttyq ulan jaıly atap óter bolsaq, Elbasy N.Nazarbaev táýelsizdik alǵannan keıingi quqyqtyq tártipti qamtamasyz etýge jiti kóńil bóle otyryp, egemendik deklarasıasy jarıalanǵannan keıin nebári 26 kúnnen keıin, ıaǵnı 1992 jyldyń 10 qańtarynda memleketimizde alǵashqy kúsh-qýat organy retinde İshki áskerdi qurǵan bolatyn. Sol kezden bastap keshegi İshki ásker, búgingi Ulttyq ulannyń jeke quramy alǵa qoıylǵan tapsyrmalardy laıyqty túrde oryndap, jeke adam men azamattyń konstıtýsıalyq quqyǵyn, qaýipsizdigin, qoǵam qundylyqtaryn, memleket turaqtylyǵy men tynyshtyǵyn qaýip-qaterlerden jan-jaqty qorǵaý jolyndaǵy jaýapty qyzmeti abyroımen atqaryp keledi Bıyl Ulttyq ulannyń qurylǵanyna 25 jyl toldy.

Maıor Arman ÁÝBÁKİROV,

Almaty qalasy