Otyrys aıasynda MÁMS engizý taqyrybynda QR densaýlyq saqtaý mınıstri E. Birtanov, «Áleýmettik medısınalyq saqtandyrý qory» komersıalyq emes aksıonerlik qoǵamy basqarmasynyń tóraǵasy E. Bahmýtova, Mańǵystaý oblysynyń ákimi E. Toǵjanov, Aqmola oblysynyń ákimi M. Myrzalın jáne Atyraý oblysy ákiminiń birinshi orynbasary S. Luqpanov baıandama jasady, dep habarlaıdy Qamshy.kz aqparat agenttigi Premer-mınıstrdiń baspasóz qyzmetine silteme jasap.

Baqytjan Saǵyntaev densaýlyq saqtaý, aqparat jáne komýnıkasıalar mınıstrlikterine oblystardyń, Astana, Almaty qalalarynyń ákimdikterimen birge jumys berýshiler, kásipkerler jáne ózin-ózi jumyspen qamtyǵan azamattar arasynda aqparattyq-túsindirý jumysyn jandandyrýdy tapsyrdy. Budan ózge, Memlekettik kirister komıtetimen birge jumys berýshiler men jeke kásipkerlerdiń aýdarymdary men jarnalaryn tóleý boıynsha apta saıynǵy monıtorıń júrgizý tapsyryldy.  

Sondaı-aq, Premer-mınıstr tabystary tómen, nemese joq azamattarǵa basa nazar aýdarýdy tapsyrdy. Oǵan beıresmı sektor jumysshylary, tirkelmegen jumyssyzdar, mártebesi joq tulǵalar jatady.

Bul azamattar mindetti áleýmettik medısınalyq saqtandyrý júıesinen tys qalmaýy úshin Eńbek jáne halyqty áleýmettik qorǵaý mınıstrligine oblystardyń, Astana, Almaty qalalarynyń ákimderimen birge kelesilerdi pysyqtaý tapsyryldy:

• osyndaı tulǵalardy olardyń málimetterin (JSN, meken-jaıy, telefony jáne t. b.) kórsete otyryp, sáıkestendirý tetigi;
• mindetti áleýmettik medısınalyq saqtandyrý júıesimen qamtý maqsatynda olardy jumyspen qamtamasyz etý sharalary.

Sondaı-aq, Densaýlyq saqtaý mınıstrligine «Mindetti áleýmettik medısınalyq saqtandyrý týraly» Zańǵa jaqynda engizilgen ózgeristerdi eskere otyryp, aǵymdaǵy jyldyń tamyzynyń sońyna deıin mindetti áleýmettik medısınalyq saqtandyrýdyń normatıvtik quqyqtyq aktilerin ázirleýdi jedeldetý tapsyryldy.